NH 54 Chhingchhipa Thir Leilawn ṭhiat

NH 54 Chhingchhip khawlaia thir lei dawh chu Tuirini Khawruhlian kaia thir lei dawh lai chimna hmuna hman turin ṭhiah a ni ta. He leilawn hi khaw chhunga dawh a niin, a helna tur kawng laih thar a ni a, chuvang chuan hman ṭul tawh lova ngaih avangin ṭhiah a ni.

Fur pui kan hma­bak chho chauh a ni si a, he a helna kawng hi a lei a ṭha vak si lova, a min leh vak mai a hlauhawm a, sorkar pawh hian a ṭhiat hma deuh niin a lang. He a helna kawng hi laih zawh hlim chauh a la ni a, fur pui vawi khat pawh a la tawrh hma hauhva hetia a leilawn ber ṭhiah a ni hi chu ngaih a ngam zan lo.

He leilawn han ṭhiattute hi fak an phu hle. Lei ṭhiat tur hian PWD Mechanical Circle-ho an lokal a, Executive Engineer leh SDO leh Mechanic 12 vel an ni. A leilawn dawhna lai hi kawr hawp, kawng kual zimna lai tak a ni a, lei han pawh tawl sawn pawhin a hmun a zim avangin hlawm khat bak a pawh sawn theih loh. 7th March, 2018 aṭangin an han ṭhiat a, a leilawn thlur khat chauh a awm chinah hian a huphurhawm ta hle a, a leilawn lehlam pawh phelh a ngai ta si a. A leia lah a tawlh sawn thui thei der bawk si lo.

Lei thlur khat chauh a awm tawh si, engtin nge an tih ang tiin mi thil chik mite chuan hmuhnawm thlirin an thlir a. Heng mechanical a an SDO leh mechanic pakhat chuan a leilawn thlur khat rih zawngte an chawk chhuak a, uluk takin an chhut a, tichuan an ṭhiahna lama a delh nghet a, a buktu tur dah ngai zat nen an chawk chhuak vek a. An han pawh tawlh dawn meuh chuan mipui lam chuan a chim ngei ringin an thlir ṭhap a.

Heng lei dawh mechanic-ho hi an fakawm hle. Zingah ni se, zing dar 5:00 velah an hna thawk turin leilawn hmun an thleng hman tuk tin a, tlai lamah ni se khaw thim dawn thlengin ngawrh takin an thawk ni tin a, hetiang taka rim hian kan sorkar mite hian hna an lo thawk ṭhin a ni tih reng ka lo suangtuah ngai lo. An fakawmin an entawn tlak hle mai.

Heng ho hi kan Zoram leilawnte hi a dawhtuah ṭang zel thei sela, lei chim tih ang reng pawh hi a tlem deuh chek ang a! An ṭhiat lai han thlir khan a kilhna an han la turte kha a hautak em em a, kan ram hruaituten leilawn chim chhan an sawi a ‘a kilhna misualin an ruk vang’ an ti maite kha a awihawm lo thei rum rum mai.

Muang leiah pawh kha ti taka chhut bur bur ngai kha a ni si a, a ru tur chuan thawm a ring duh dawn em a, a ruk arala han ruk chi a nih hmel loh em mai a! A enga pawh chu ni se heng PWD Mechanical Division ho hi an thawhrimna leh an inpekna te, an remhriatnate hi fak an phu hle a ni.

Tihrualin helai leilawn ṭhiah a ni ta mai hi chu an ṭhiat hma em mai a, fur khat tal kawng thar hian han tuar ve phawt se, a lo ṭhat tak chuan ṭhiah ni chauh se a ṭha awm mang e tih thilah leh ngaih a la ngam loh em avangin sorkar hriatah tiin ka han sawi ve a ni e.

Patrick Z, Chhingchhip