Congress zawk hi an phir lo maw?

Tun hnaiah MNF hotu lam an phir tiin an sawi an sawi a, Pu Zoramthanga'n Dr R Lalthangliana chuan Vice President aṭangin a paih thla a, engtikah mah MNF President nih tum ve ngai lo tur Pu Lalthlengliana a ruat. 

Pu Thlenga hi Pu Zorama leh Pu Tawnluia te ang bawka 'vangvat kai' a ni a, Pu Thangtea hi chu vangvat kai a ni ve lova, hei hian MNF chhungah na takin boruak a kal tir mek, tih hi an sawi an sawi ṭhin a ni. Mahse hetihlai hian Congress chhungah zawk hian tunah pawh hian Party President Pu Lal Thanhawla thlak duhna lian tak boruak hi a la thi lova, a thlaktu atan mi hrang hrang an dap kual niin an sawi ve leh tlat mai, tlat mai a. 

MNF boruak hi chu chiang takin a lang nghal mai a, Dr Thang­tea a nih rual hian Pu Tlanghmingthanga pawh an han paih pawp mai a, Pu Tlanga Vice President aṭanga MNF member naran ni tura an paih tuirha a TV interview lo en fuh tan kha chuan a lawm lem lo tih pawh chiang takin a lang nghal awm e. 

Pu Thangtea pawh hi Hnam Runah hian amah ṭantu an awm rual hian tunah hian Pu Zorama nen boruak an neih nia an sawi hnuah hian ṭan lotu an awm ve mek bawk an ti leh tawh a ni. 

Chanchinbu lar tak pakhat The Zozam Times aṭanga a lan dan phei chuan MNF hruaitu inthlak boruak hian Lunglei lam pawh na takin a nghawng niin an la ziak lehzel a ni. Hetiang hi chu ruling nih lai chuan sum leh thiltih theihna hian a hliah khuh ṭhin a, a ṭhelh mit hmak thei e an tia lawm. 

MNF kan sawi kan sawi lai hian Congress hi chhungrilah an lo khi ve ruak mai a, a hmaa Pu R Lalzirliana chhuak kha chu Cong­ress buaina lam ni lovin amah thlung bettu lamin an kai chhuak a, Congress-a department lian leh sum tamna enkawltu tan chuan Congress lama lungawi lohna vak aiin a chhan chu mi pangngai chin chuan kan hre zawk a, an kai chhuak ta a, ani pawh MNF lamah thu hmel deuh si reh ngawih ngawihin an phum mek a ni. 

Tuna Congress buaina chu Pu Hawla a upa ve tawh si, lea­dership nei ṭha eng ang pawh ni se Chief Minister thei chi ziazang a ni tawh dawn lova, amah thlaktu tura an beisei Pu Lal Thanzara hian a tum ngam tak tak si lova, Pu Liansailova hian a beisei loh mai bakah a duh si lo. 

Pu Zodintluanga hi party chhungah pawm lotu an awm thluah mai bawk si a, an party mi ṭhenkhatin Pu Lalsawta te an lo va dawra ani lahin a duh mang si lova, Ex Minister pahnih vel chu Pu Hawla thlak tumin an phi ruai a lo ni awm e. Hengte hi party lian ziarang chu a ni ta lo ve khawp mai a ni. 

ZPM chu an phel ta law law a, Pu Lal­duhawma a lansarh apiangin MPC lam kha an mit a mim tlat a, Pu Ṭhenphunga hnuaia awm ṭhinin ruling pawh ni chuang lova Pu Duha hova awm kha an duh lova, chu bakah MPC Office an inchuh boruak avangin MPC President Pu Lalhmangaiha leh a zuitu tlem chu ZPM aṭangin an chhuak a, PRISM lam an va belbul dawn an ti ve leh bawk a nih chu. 

Tunah hian MNF hi lian takin a phir a, inthlan dawna lang chhuak tur angin an sawi. Chu ai maha phir nasa chu Congress hi an nih hmel; ZPM pawh an phir thova an phel ta law law bawk a, heng hi politics history-ah chuan thil thleng ngai lo lah zuk ni suh le.