KAN DUTY CHHAN HI KAN HRIAT FO A NGAI

Hripui avangin mipui kan buai a, Task Force te kan din a,mi harsa zualte ṭanpuina kawngah pawh an thawh hlawk hle.

Hri kai an awmin an chhui zui a, sample lak a ngaih hunah ko khawmin an lo buaipui leh vek ṭhin, tha leh zung senna a awm ṭeuh a ni. Tlawmngaia thawk chhuak ṭhinte fakna tur zawng zawng tichhe thei tura duty chhan hre miah lo emaw tih mai tura kal na, ngam zawngte hnuaichhiah taka ṭawngkhum leh kut­thlak ching mi an lo awm ṭhin hi a pawi tak zet.

Tunhnai video-a duty kutthlak lai darh ta vak mai ka hmuh khan ka rilru a khei zak mai a. Engnga tinge hetiang zawnga insumtheihlohna hi kan neih tak fo mai le ka ti ṭhin. A bulṭanna tih velah hian ka buai lem lo, kan duty-naah hian a tupawh hi hawihhawm takin lo dawngsawng ila, engkim hi a fel duak zawk ṭhin.

Kan duty hah avanga kan thinchhiat dawn leh midang chunga kan inchelek dawn a nih ai chuan chawlh hahdam mai hi a finthlak ber fo. Tlema chapo deuh kan lo tawng a nih pawhin zawldawh zawka ṭan hram hi kan tih turah kei chuan ka ngai.

Thu a kan sawi fel thei lo a nih chuan duty office-ah hruaiin thu leh hlain kan inhmachhawn mai tur a ni zawk. Chuta kan la chingfel thei lo fo a nih chuan dan kengkawhtute kuta hlan mai hi a finthlak bawk a ni.

Tunlai chhana Task Force hminga kan duty a nih ngat phei chuan kan duty chhan hi kan hriat chian a ngai hle. Hripui veng tura duty nihna laiah dan bawhchhia an lo awm a nih chuan sawrkarin hrem theihna a duan anga hrem mai kha a tawk viau. Chutah pawh kan ti leh teh ang, an harsatnate kan ngaihthlaksak hmasak phawt aṭang tea thutlukna siam hi a ṭha hle a, rilru dam tak pawhin kan inchhuah fo thei zawk a ni.

Sawi ta sa sa, ruihhlo lamah pakai zuai ila. Khawi veng leh khua pawhin ruihhlo hi kan do em em vek a ni. Kan ruihhlo do dan kalphung pawh hi kan thlak hret chu a ngai ve tawh viau mai.

Ruihhlo ngai leh zuarte hian sim har an tihdan a intluk tlang deuh reng tih hi kan hriat vek a rinawm. Mahni veng/khua a ruihhlo ngai leh zuarte hi kohkhawm chang neih a, awareness pek ṭhin te hian kawngro a su viau a nia. Tin, an chenna ina len a, an harsatnate hriatpui tura kawm zauh zauh chang neih te hian mi tam tak rilru a hneh zawk ṭhin.

Kum kha leh chen vuak leh vau, hnuaichhiah leh diriamin kan lo umzui tawh ṭhin a, an sim phah em? tih hi chhui kir fo ang u.

Vuak leh vau, hnawh­chhuah hian hlauhna chiah a siam a, hmun dangah sim chuang si lovin an thil­sual tihna hmun an sawn zel a ni ber awm e. Dawhtheih­na leh ṭhatnaa hneh tum erawh hun a duh rei a, kum tam pawh a ngai hial thung. Amaherawhchu, hetiang aṭanga ṭha chhuak ta erawh an nunhluiah an kir leh vak ngai tawh lo thung.

Khawtlang tana duty a ke i pen rual chiah hian eng hi nge ka duty chhan tih hi ngaihtuah nghal ṭhin la, kan duty chhan a zira kan insiamrem thiam tluk a pawimawh hi a awm chuang lo. I kut a thak chuan midang hiat lovin nangmahin hiat mai la, i ṭawngkam hman tur i hman chhuah hmain i ka veng hmasa ṭhin bawk ang che.

C. Lalhmingliana, President, Falkland Branch YMA