LENGPUI AIRPORT A PUI
Han sel deuh ila, tu tu ten emaw min rawn kawh letna tur zawng zawng pawh ka hre sa. Chuti chung chuan intihuaisenin i han sawi tho tho dawn teh ang.
Ka ṭhianpa hi tunkar khan chhungte damloh thilah Mizoram a lo chuang chhuak a. Hrilen lai a ni nen, zin veivah chak vak lo chi nih nen, damlohna thil nimahse a rilru a khingbai hle tih ka hre thei a.
Kawng tluanin kan in-text deuh reng a, a thlen china a thil tawn a rawn update ve zel bawk a. Indian embassy aṭangin vaiho a ning ṭan tawh a. Haw kawnga vaiho chhangchhia leh hawihhawm lo lutuk bakah, an chuhhelh lutuk reng mai a khamzia a rawn sawi ṭhin a. Hei hi chu kan hriat tlan ṭheuh ni mahse, hmuh thar apiang hian mak tih tur a awm a awm ziah tho. Vaiho zingah intlarin awmzia a neih lohzia a hre nawn zing hle bawk.
Calcutta aṭanga Mizoram thlawk tur chu zaa 75 vel vai an nih thu a sawi a, nghakhlel taka Lengpui a thlen tak thu leh, Lengpui airport pui a tihzia thu chu a sawi bang thei lo - a kum khaw sawi a tling hial mahna.
"Lengpui airport chu luh phatna lam bang kha a lo chim hei huai a, engtin nge a chim theih pawh ka hre lo. Mau hian an do ṭuk a, vai puanzar nen, baggage carousel a awm loh avangin kan bungrua te chu an rawn theh chhuak tawp a. Vai leh vaivut a tam em em a, bathroom te chu hman ngam loh khawpa tenawm a ni. Mite chu mau intung ṭhet ṭhut karah chuan an vei tawn sek a, veivak an tam a, hnawmhnawk alawi an awm si lo. A balhzia leh ṭawpzia chu mak tiawm pawh hian an lang lo va, ngaiah an neih tawh a nih hmel. A bul lawkah chuan ei tur zuar an ṭhu nghal bawk a, pui tak a ni pui tak. "You should see it yourself, you’ll kneel down and cry," a ti a.
Heti taka a tawp chhan hi under construction a ni e, ti dawn ila, mi ramah pawh under construction chu kan hmu fova, felfai takin a hmatiamin an sa mai a. Safety vang leh mawi loh hlauh avangin hna thawhna lai chu an hung mai ṭhin. Under construction hi chhuanlam a tling lo.
Ka ṭhianpa pawh hi ram hmangaih chi a nih avang leh kei pawh phak ang tawka Mizoram ṭan ve bur ṭhin ka lo nih avangin a rilru na min rawn share ngam a ni. Kan rilru a hnual dun hle. Kan CM ber khan cute taka siam a tum thu kan lo hre ve si a, chuti taka a hlawhchham ta mai chu eng vang nge ni ang le kan ti vang vang a ni.
Ram chenbeh deuh pawh hian a harsa a harsain an airport te tal hi chu an tuaihnum ve hram hram ṭhin. Kan airport te, Vanapa Hall te kan tuai hnum zo tawh lo a nih chuan, cell phone ṭha, sneaker manto leh fashion lamah te tlan thei kan ni tawh lo tak zet zet a. Kan airport ang mila kan khawsa dawn a nih chuan puanpheikhawk sen, bawhtah kawr leh kekawr minus cell phone leh car nalh te kan phu tawk hial awm e.
Sumah kan harsa a nih chuan kan CM hian adviser pahnih lai a neih te hi a mamawh chuang lova, amah hi phai lam aṭanga mithiam lo kal pawh thil lo hrilh hrep thei khawpa thil hria a ni tho va, ban sela, heng sum (thla khata nuai 7 ṭhelh) te hian thianfaitu la zawk se, airport cute neih kan hnaih zawk viau lo'ng maw?
Kima Khiangte, USA