Aibawk field tlawhtute

Keini ang duang chuan Aizawlah cheng nuai 400 sengin field siam a ni tih pawh kan hre ve lova, ZPM MLA-in a tlawh tuk lawka MNF sorkara Minister-in a tlawh zui ve vat avang hian heti khawpa field pawi­mawh hi a lo awm reng tih kan hre ve ta a ni.

Chu field siamtu lah chu tun hma chuan tuna Minister ni ta company/ firm hi a lo ni lehzel bawk nen Aibawk hi khaw vannei tak an ni thut a, he field hi a siamtu lam pawhin an beisei aia ṭhaa an siam zawh loh chuan kum 2023 mai hi MLA inthlan a nih bawk si avangin mahni chanpual field a huna siam zawh sak loh khaw vanduai tak chu field ṭha tak nei tur khaw vannei takah an chhuak dâwn chu zuk ni ta hlauh a!

Hei hi thu kal vel dan chu a ni:- Aibawk Mini Sports Complex hi NLCPR hnuaiaah kum 2019 khan hmalakna bul ṭan a ni. RD Department hnuaia awm a ni a, cheng nuai 413 ruahman zinga nuai 13 chu DoNER ministry-in a cut hnuah nuai 400 sanction niin first installment atan nuai 180 hmuh a ni tawh a, kum thum chhunga siam zawh tur a ni.

Hna a muang si a, khelmual hi a hnim khat vek bawk nen ZPM MLA Pu C Lalsawivunga chuan September 3 khan a tlawh a. A hmun­ah ngei kalin kal hleihtheih loh khawpin hnimin a bawh khat a, a dinhmun chiang tak chu social media lam­ah kan lo hmù a ni.

Aibawk khaw mipui an hmangaih vang te, he khelmual hi puitling thuai se an duh avanga an vei em em avang pawh a ni thei. A hma zawnga tlawh lem lotu nia lang a Department changtu RD Minister Pu Lalruatkima leh Bialtu MLA (a hmain a tlawh thu tarlanna hmuh tur a awm mai lo) Prof Lalnunmawia te chuan September 7 khan an va tlawh leh a. An tlawh hma hian hnim hi hmanhmawh taka sam fai niin mihring tha bakah khawl lian (JCB) an ruai hial niin Aibawk khaw mite chuan an sawi.

Engpawh chu lo ni se Sept 3-a hnim em em an lo sam fai hrim hrim hi thil lawmawm tak a ni. RD Minister sawi dan chuan NECS hian hna 80-90% vêl chu an thawk zo tawh a, chuti a nih chuan hawn theih chu a ni thuak tawh tihna a nih hmel. Hemi atan hian contractor pawisa dawn chu nuai 400 turah nuai 180 lek ni chunga 80-90% zet an siam zo hi thil thleng khat tak, thil lawmawm em em a ni.

Aibawk field ngaih-saktu nei vak lem lovin September 3-a tlawhtu MLA a neih hnua a hna changtu Minister leh a bialtu MLA in Sept 7-a an tlawh zui leh vat pawh hi thil lawmawm tak a ni.

K. Marinsanga