Inkhawm chawlh rih a ṭha em?

Thil sawi nuam lo leh rawt nuam lo tak kan rawt teh ang. Kan hriat ṭheuh angin tunlaia hrileng mek Covid-19 vangin khawvel a phili a, punkhawmna lam chi reng reng chu an inkhap siak a ni ber mai. Mipui punkhawm tamna ṭhin infiamna chi hrang hrangte pawh ṭhulh hrih a ni deuh vek a ni. 

Mizoramah sor­kar, pawh pawl hrang hrang leh poli­tical party-te'n an programme an ṭhulh a, kohhran ṭhenkhat pawhin an programme duan lawk tawh an ṭhulh mek a ni. He natna kai awlsam tak hi mipui pungkhawm zingah pakhat pawhin lo kai se keini Mizo hnam tlemte te hi chu rei loteah he hri hian nasa takin min nuai dawn tih a chiang reng. 

Mizote Kristian kan nih angin in­khawm ṭhin kan ni. Ṭhalai, hmeichhe pawl leh pa/ pavalai pawlte nen phei chuan kar khatah ṭum 6/7 te kohhran hrang hrangin kan inkhawm hlawm a ni. Inkhawmnaah hian kohhran lian deuh phei chu mi 500 chuangte an inkhawm ṭhin awm e. Khawvelin punkhawm loh lam a uar zel lai hian, inkhawm pawh hi chawlh hrih a ṭha ang em? 

Sorkar, pawl leh political party-ten an programme ṭhulh mah se, inkhawm ber kan ṭhulh miau loh chuan a sawt mawh viau ang. South Korea lama Covid-19 a darh chhan pakhat pawh kha inkhawmna aṭangin a ni kha, chuvangin fimkhurah fimkhur luat a awm thei awm lo e. 

He natna hri a len chhoh chhung bik hi inkhawm hi ṭhulh ni ta se kan Kristianna hi a tlakchhiat phah kherin a rinawm loh. Inkhawm hi ka sawisel lo a, inkhawm ngai lo ringtu chu ringtu 

ṭhaah ka pawm hek lo. Mah se, khawvelin a buaipui he natna hri a len lai bik hi chuan inkhawm hi tih tawp hrih nise, mitinin mahni inah ṭheuh kan Pathian hi be hrih ta ila, he hri leng laka kan invenna atan a pawimawh viau lo ang maw? 

Sorkar chuan punkhawm a khap a, mahse inkhawm erawh a khap ngamin a rinawm loh. Sorkar hi dem tur a ni loa, kan ram dinhmun thlirin inkhawm hi khap ngam chi a ni lo. Chuvangin, kohhran hruaitute hi uluk takin ngaihtuahna seng se, inkhawm ṭhulh hrih hi kan ram leh hnam himna atan thil ṭangkai tak a ni dawn em tihte hi Pathian rawn chungin ngaihtuah se a duhawm hle. 

Kan hnam kan tlem si a, hmanrua leh bungrua kan nei ṭha si lo, he natna hri hian min nuai ve  anih chuan kan tuar nasat dan tur chu ngaihtuah ngam chi pawh a ni awm lo e. 

Biakina inkhawm ṭhulh hreh tak tak mi engemawzat an awm a, inkhawm hi chawlhsan lailawk a nih loh chuan chung mite chuan inkhawm an ṭhulh lo tawp ang. Sawi tawh angin he natna hi kai a awlsam em em a, he hri kaiin dawhkan emaw thil a khawih hnu khawih ve ringawt aṭang pawhin a in kai chhawn mai theih a ni. 

Chuvangin, Mizote kan awm khawm tamna ber inkhawm chungchang hi kohhran hruaitute hian ngaihtuah se ka va han duh em.