Coronavirus fiahna

Thlalâk mawi tak tak karah, “Zonun ze mawi chawi san,” tih thupui hmangin Chapchar Kût kan hmang a. Tlawmngai hnam, mi dangte tana inpe ṭhin, ‘Sem sem dam dam, ei bil thi thi’ ti ṭhin kan nih thu kan tlangaupui dum dum a. A tûk lawkah buhfai kan lei khâwm leh chuk chuk hlawm a. Midangin lei tur an nei ve lo ang tih lam kan ngaihtuah lo va, kan hmuh hmuh kan hai khâwm nghal bawrh bawrh hlawm ni mai hian a hriat a ni. 

Hmân deuh khan chi a vang dawn tih avangin Zoram hi a buai phili chung tawh a. Hmânni lawkah Coronavirus vangin kan buai leh viau bawk a. Inngaihtuah chian deuh chu kan ngai a ni. 

Buhfai chhêk khawl hi a ṭha viau a, hun harsa lo thleng tur laka inbuatsaih lawk hi mifing tihdan chu a ni meuh mai. Mahse, eng emaw a lo thlen a, mi dangte pawhin an mamawh ve dawn tih hriat reng, mi dang pawhin hun an ngah bîk lo tih chiang tawhah he Mizo rilru hian ‘Sem sem dam dam, ei bil thi thi’ tih a hrechang tawh lo a nih chuan a dik tawh lo thung a. Mahni hmasialna hi Mizona keh Kristianna laipui nena inkalh a ni tlat. 

Kan ṭawngkain sawi sawi ṭhin mah ila, kan chêtdan hian kan tlawmngaih lohzia a lantir fo a, midang kan ngaihtuah leh kan ngaihpawimawh lohzia hi a lang chhuak nawn awn awn fo a ni. 

Ṭhenawmten ei tur an neih loh dawn chuan mahni buhzem zen a, a thlawna ei tur pe ṭhin Mizo thlah kal zêl kan nih hi kan hre ta mang lo va. Mahni hmasialnain he Mizo thinlung hi a bual â zo ta em ni tih mai a va awl ṭhin êm! Ṭha viauin han insawi ṭhin mah ila, kan ṭhat tâwk lohzia hi a lo lang leh ṭhin a. A pawi ṭhin ngawt mai. 

Thil thleng tam tak ngaih­tuah hian, Mizo Kristian te hian hlauh tur kan zawng em ni tih mai a awl ṭhin. Khawchhak lungpui lum hlau te kha Mizo an ni a, Chi van vanga tâl buaia hlaute kha Mizo kan ni a, tuna Coronavirus avanga hlaua philite hi Mizo Kristian kan ni. 

Chawlhni-ah kan in kan kalh a, kan khawlai reh vek khawpin Biakin kan pan khâwm a. Inkhâwmpui ropui tak tak neiin kan kal khâwm a, Isua Krista hming lamin ban kan phar a. Pavalai Inkhâwm­puiah paho an lam a, Biakin chhungah an leng lo va, an lamdan pawh a hranpaa buaipui tham a ni a; inkhâwm tum leng lo, Biakin leh a vêla ṭhu zât pawh chhiar sen an ni lo tihte chu kan sawi a. ‘A va thlamuanthlâk êm!” kan ti a. Mahse, hun a lo kal hret a, kan thlamuan lohzia a rawn lang leh a. Kan buai leh chûk chûk hlawm si a ni! 

‘Thlamuang takin awm rawh u, keiin khawvêl ka ngam ta,’ ti-a min chahtu Isua Krista, kan rinna siamtu leh tifamkimtu lam ai chuan kan fairelbel kan en a; kan thlamuanna chu chutah chuan a innghah avangin kan hlau a ni! 

Daniela leh a ṭhiante mei puia paih an nih khan, nat pawh an na lo a ni satliah lo, an samzai khat pawh a kang lo va, mei rim pawh an nam lo a nih kha. Kan sawi fo va, Daniela leh a ṭhiante vengtu kha kan Pathian niin kan chhal a. Mahse, chu Pathian chuan hun harsaah min kalsan dawnin kan hria emaw tehrêng ni? Kan buai phili nghâl chung chung mai hi a a mak a ni! 

Kristiante hi hlau tura zirtir kan ni lo va. Kan Bible-ah hian ‘Hlau suh’ ti-a lehlin theih thumal hi 365 a awm an ti. (King James Version 1611-ah chuan Fear not tih thumal vawi 169, Be not afraid tih thumal vawi 79, Have no fear tih thumal vawi 25, Shall not fear tih thumal vawi 55, Do not fear tih thumal vawi 37; a vaiin vawi 365 a awm an ti) Chu chu kum khata ni awm zât a ni a. Ni tina hlau lo tura zirtir kan ni tihna a ni maithei. 

Presbyterian Kohhran phei chuan, “Bible hi rinna leh tehna dik lo thei lo,” kan ti a. Mahse, chu rinna neitu ni-a inchhalte hi kan chêtdan en hi chuan kan mûmal lo a ni! Kan rinna innghahna chu Bible ni lovin, social media-a thu leng vêl te a ni fo mai.

Heti hian ti teh ang - Coronavirus hian khawvêl pumah, mi zawng zawng a tibuai mek a. Sakhaw tin kalphung nghet sa a rawn su her bawih bawih mek a. Chu chu fiahna te pawh a ni hial maithei. Keini pawh, hmanni lawkah ‘Sem sem dam dam, ei bil thi thi’ tiin kan au a, kan zaiin kan lam a. Mahse, chu kan thuthlungah chuan kan ding nghet em tih chu he Coronavirus hian a rawn fiah a. Kan thluthlung bawh thlu rum rum khawpin mi ṭhenkhat chu min rawn phekphelen a nih hi! 

Ni, “Hei hi a ni, khawvêl hneha ngamna chu, kan rinna hi,” ti-a zai ṭhin Mizo Kristian -te chu fiahin kan awm a. Kan himna kulhpui chu eng chiah nge a nih a, hlauhna atâ min chhandam a, nghet taka ding tura min ṭanpuitu tura kan ngaih lakah chuan rinnain kan awm em tih keimahni ngei infiah turin min rawn cho a ni. Kan tling zo lo mek em le!?