HMELṬHATNA

Hmel ṭha han tih chuan a huam zau viau thei awm e. Heta ṭha ka tih kha, sawtah ṭha an ti ve lem lo thei bawk. 

Hetih lai hian veng khat nula hmel ṭha, khaw khat nula hmel ṭha kan tih ang chi te hi chu an awm ve tho a. Miss Mizoram te kan han thlang a, heng mite hi chu mi bik an ni tlat. Mipui nawlpui te hi chu kan hmeltha ber ve hlei thei lo,kan in pawm theih a ngai.Mahse,hetiang hi nimahse,hmelthat dan hi kawng dang a awm thei tho a ni,chung te chu vawiinah han ngaih­tuah ho tum dawn ila a tha awm e. 

Hriselna- Miin khawvel hi a pum in nei sela a nun chan si sela atan engnge sawt ang, tih ang deuh khan hmel, hmai fang ṭha viau mah se, a hriselna a ṭhat loh chuan a nun a zuai ruih ang. Hriselna ṭha tur chuan mut ṭhat, zuk leh hmuam tih loh leh taksa sawi zawi te a pawimawh. Ei leh in chungchangah pawh kan fimkhur a ngai; sa-ah pawh sati var heng, arsa, sangha tih ang chi te hi a hrisel. 

Nihna anga lan ngam - Mizote chu a tlangpui thu in incheinaah kan sang a, belh chian kan dawl lo ṭhin. Mi hausa tak ni awm taka inchei ai chuan kan neih ang tawk in inchei ta zawk ila, kan mawipui tak tak zawk daih ang. 

Siamtu ṭih - Nula hmel ṭha tak mai, nungchang ṭha bawk si te hi chu an hmelṭhatna a thuah hnih bik, chutiang bawkin mipa pawh. Hmelṭha lem lo mah se, fel tak mai te hi an awm ve bawk a, heng mite hi chu kan hmu ṭha chawp mai a ni, an felna khan a hliahkhuh vek a ni. Nungchang mawi leh ṭha nei tur hian a bul berah chuan Pathian thu awih a ngai. 

Hmel ṭha tur chuan Pathian thu awih hi a ngai tel tlat, tichuan, kawng tin­rengah hma kan lo sawn tawh mai dawn a ni. 

Hmelṭhate chuan mi an ti hlim a, an bula awm a nuam hle. Ar talh dan chi khat chauh a awm lo, an tih ang deuhin hmelṭhat dan pawh hi chi dang a awm ve tlat a ni. 

Mi a fel phawt chuan a hmel ṭha sawt a, a lo changkang sawt a, miten an zah mai ṭhin.