COVID-19 DO DAN FUH TAWK LO VANGIN HEALTH MINISTER AN BANG SUP SUP

COVID-19 dona kawnga chak tawk lo a ngaih an nih avang leh mawhphurhna hlen zo lo a inhriatna avangin khawvel hmun hrang hrangah ram hruaitu lawk an bang nasa a. Italy Prime Minister te, Mongolia Prime Minister te, Holland Prime Minister te, Malaysia Prime Minister-te pawh an mawhphurhna hlen zo loa in ngaiin an bang vang vang mai a ni. India ram tiamin Health Minister pawh an bang nasa hle. Sawi vek sen ni lo mah se, Health Minister bang ta te hi a ṭhen a zar lo tarlang ila :

1. Equador ram Health Minister Rodoldo Farfan chu Healh Minister atana ruat a nih aṭanga chawlhkar thum hnu, March 2021 khan COVID-19 vaccine pek dan chungchangah fel lo taka kalpuia puh a nih avangin a bang.

2. Austria Health Minister Rudolf Anschober pawhin April 13, 2021 khan a hna zo loa in ngaiin, mi fit zawkin a ai an awh theih nan a bang.

3. Iraqi Health Minister Hassan al-Tamimi chu May, 2021 khan a bang.

4. Argentina Health Minister Gines Gonzalez Garcia chu February, 2021 khan COVID Vaccine pek dan chung changa thil fel lo avangin a bang.

5. Jordan Health Minister Nazir Obeidat chu March 2021 khan Oxygen indaih loh avanga mi 6 an thih avangin a hna tlin lo ah ngaiin Prime Minister-in bang turin a ngen a, a bang.

6. Peru Health Minister Dr. Pilar Mazzeti pawh February 2021 khan a bang. A ban chhan hi mipui tana hman theiha tlangzarh a nih hmaa an ram President hlui hnena duhsak taka COVID vaccine a lo pek hmasak tir avangin nasa taka sawisel a ni a, a ban phah ta nge nge a ni.

7. Slovakia Health Minister Marek Kraji chu March 2021 khan hripui a do danah a hlawhchhama ngaih a nih avangin a bang.

8. New Zeland Health Minister David Clark chu July 2, 2020 khan Lockdown laia family trip a lo neih te, quarantine facilities enkawl dana fel lo a awm avangin a hna tlin loa ngaiin a bang.

9. Brazilian Health Minister Dr. Nelson Teich chu May, 2020 khan an rama COVID-19 vei pung chak lutuk avangin a hna tlin lo a in ngaiin a bang.

10. India Health Minister Harsh Vardhan pawh July, 2021 khan COVID-19 Pandemic a hmachhawn danah hlawhtling tawk lo a ngaih a nih avangin a bang. Minister reshufle vanga chawlhtir nia sawi ni mah se, hripui a hmachhawn danah PM Narendra Modi a lungawi lo hle niin report a ni.

MIZORAM VE THUNG...

1. Ministry of Home Affairs leh ICMR-in sample test zinga 70% tal RT-PCR hmanga Test tur a tih laiin Mizoram chuan RT-PCR hmangin 26% chauh kan test thei; 60% chuang chu ICMR leh mi thiamten test-na rintlak tawk loa an ngaih RAgT hmangin kan la test ngat ngat. Hei hi Mizorama COVID-19 kan dan chah theih loh chhan ber pakhat niin a lang.

2. Central sorkarin a senso a tum vek thei tih a sawi mawlh mawlh chungin kum khat leh a chanve chhung hian RT-PCR Laboratory pakhat pawh Mizoramin kan din belh thei lo. Lunglei a RT-PCR Laboratory din belh a nih loh nan Health Minister-in ṭan a la zawk.

3. Mizoram pumin COVID Dedicated Hospital pakhat (ZMC - Falkawn Referral Hospital) chiah kan la nei thei a, chutah chuan ICU khum 34 tiamin, COVID-19 vei na zualte enkawlna tur bik khum 307 chauh kan nei. Khum hi a full reng anga ngaih a ni.

4. Health Minister-in Assembly House-ah meuh RT-PCR leh a tlukpui hmanga test zat 59.49% angin a tarlang a, a data tarlan hi a dik lo a nih tih chanchinbu miten an tarlan hnuah Health dept chuan data dik zawk chu 26.52% a nih thu a tukah an tarlang leh. Khawvel ram danga thleng chu nise, ban puina tham a ni awm e.

5. Total Lockdown vawi 19 leh Partial Lockdown vawi 11 zet Mizoramah kan puang tawh a, khawvela COVID-19 vanga Lockdown puang rei ber kan ni. Heti chung hian India ram state hrang hrang zingah mipui awm zat aṭanga chhuta COVID-19 hri kai thar tam berna kan la ni thung.

6. India rama state tam zawk, Mizo­ram aia a let engemawzata mipui tam zawknaah pawh COVID-19 an chhu chat titih tawh a, nunphung pangngaiin an nung leh deuh vek tawh; Mizoram hi state talbuai ber kan la ni.

7. COVID-19 dona kawnga kan hlawh­chham chian em avangin Lockdown kan puang leh ringawt ṭhin a, Mizorama sumdawnna tam takin a tlakchhiat phah a, dawr tam tak tih tawp a ni a, chhuanchham chhungkaw sang tam tak an awm phah bawk. Heng mite ṭanpuina tur hian sorkarin ruahmanna pakhatmah a siam lo; mipui thawhkhawm, CM Relief Fund chauh lo chu!

8. Heti chung hian Health Minister Dr. R. Lalthangliana chuan Assembly House-ah ngei, “Mizoram sorkarin hripui a do dan a ṭha thawkhat” a ti a, “India ram dangte nena khaikhinin Mizoram dinhmun a ziaawm hle” a la ti thei cheu bawk. Ti ṭha kan intih laia mipuiin kan tawrh nasatzia te, India rama a talbuai ber state ni chunga kan dinhmun a ziaawm hle kan la ti tlat thei hi a mak ngawt mai. Mipui lam lah chuan ngaihtuah chian nachang kan hre der si lo.

Ngun takin ngaihtuah ila, COVID-19 dona kawngah hian Mizoram mipuiin sorkar thu kan awih em em a, sorkar zawk hian a tih tur a ti tawk lo a, a hlawhchham chiang hle. Health Minister pawh hi a hlawhchham a ni tih i hrethiam teh ang u. Kan inhriatthiam a, kan in ngaihdam zel chuan hma kan sawn tak tak thei dawn lo e.

Zothani Khawlhring