September 18 hnua awm dan tur

Vanglaini editorial "September 18 hnua kan awm dan tur," tih kha ka lo chhiar a, ka rawn tui hnih ve zawk duhna lai tak chu, "September 18 thleng inkaihhruaina kan nei tawh a, hei hi a nihna takah chuan August 22-a hman ṭan daih tawh kha niin thla khat dawn chu a ngai kan hmang dawn tihna a ni.

Hri hi engtin zel nge a awm dawn kan hriat loh vang tak hian inbuatsaih lawk a ṭul a, khawtlang leh kohhran hruaitute nena inkokhawm duaha ngaihtuah chiam kher lo pawhin mithiamte'n kan hmalama kal dan tur hi lo ngaihtuah lawk thei se a ṭha ngawt mai," tih lai tak hi a ni.

Medical Operation Team kan nei a, doctor thiam rual an ni. Anni rawtna hi Covid-19 kan do danah a tlang lo an tih khan mak tih namen lovin mak ka lo ti ve a, mahni awm hmunah hian, hri chu doctor-in an hre ber ang. Anni hian a do dan tur an rel ang a, chu chu tlawmngai pawlte chuan kan lo zawmin kan thiamna laiah kan lo pui ve tur anga ka ngaihlaiin Chief Minister lama mahni pawl/ kohhran hruaitu ngaihdan lo thlen khalh a, MOT rawtna ang ni lova kan kal daih mai kha kan tih fuh loh lian tak a niin ka hria a ni.

Kan do tur hi mihring ni se, sipai ni se, hel pawl chu ni se tlawmngai pawl hruaitute thu hi zawm tur chin a awm ve ka ring. Mahse, hripui donaah hi chuan doctor rual chauhin rawtna siam se, chu chu sorkar, pawl leh kohhran lam pawhin lo bawhzui mai ila. Sept. 18 hnuah hi chuan hman deuha Lockdown duh tawh lo doctor-te hi chuan partial Lockdown pawh hlih an duh tawh ngei a rinawm.

K Lallianmawia