State Referral Hospital, Falkawn

Ka mita lungte awm zai a ngaih avangin dt. 3.3.2020 khan Falkawn Referral Hospital ka pan a, Male Surgical Ward Bed No. 17-ah min admit a. March ni 4 khan Dr. Tetea’n min zai ta a, rilruah thil tam tak a lo lang zut zut a. 2018 khan ka fate pahnihin he hmunah hian naute an nei tawh a, kei pawh inentirin ka kal fo a. Ka thil hmuh leh hriat te han tihrik ve ka duh a ni. 

Ka fanute pahnihin he damdawiina naute an neih khan naute neihna tlak a ni tih kan hmu. Hmanrua an nei ṭha a, doctor an thiam a, nurse an fel bawk. A bika enkawl ngai angte pawh an case a zirin an enkawl thei a. 

Damlote tana damna tur thil pawimawh em em mai chu ‘thla­muanna’ a ni a, ‘lung­damna’ pawh a ni tel ang. Ward-a damlo pakhat chuan Civil Hospital-a nurse vin tak ṭhin kha hetah chuan a vin hauh lo a ti pek a. Vin vak vakte hian damlohna a chhawk lem lo khawp mai. 

Falkawn Refe­rral Hospital-a thawk doctor leh nurse-te hian an damlo enkawlte chungah ṭhat an chhuah ṭhin a, awki vin an hmang ngai meuh lo. 

Aizawl Civil Hos­pital-a kan in ekbeng vak ṭhin kha Referral Hospital, Falkawn hian kawng tam takah a lo sukiang a, ram chhung hmun tin aṭangin an pan khawm mek a, private damdawiin pan remchang lo tan chhenfakawm a ni. 

Central leh State aṭanga Golden Card nei te, State Health Care Scheme te tan a hman theih bawk a, Health Care a kan inziah luh dan a zirin pawisa pe nghal kher lo pawhin a theih a ni. 

Mizorama College kan neih azawnga hlu ber tih theih, Zoram Medical College awmna a han ni lehzel a. ZMC leh Referral Hospital-in a ken tel hmasawnna chu Falkawn leh a chhehvelah hmuh theihin a lang mek a ni. Chhungkaw tam takin eizawnna kawng thar an neih phah mek a ni. Hei hi a nih avangin he hmun petute hi Falkawn khawtlang pawh hian chawimawina hlan se a inhmeh lo hauh lovang. 

Rawtna tlem zeh ka duh. Sorkarin MST Bus a tlantir a, a tawt thei hle. Staff bus hi a hranin a tlan tawh em? a tlan loh chuan tlan tir thuai nise. MST hi passenger bus chu ni mai se. Bawngkawn aṭangin tlan ṭan se. Ramhlun Industry peng, Chanmari, Bazar Bungkawn, Treasury Square, Sikulpuikawn leh Kulikawnah Bus Stand timing nei thlapin siam se. Bus fare sorkar kuta a luh dante pawh uluk deuha enpui a ṭha. 

Falkawn Hospital main gate aṭanga Hospital pan chhohna dinglam hrulah motor garrage siam chhoh vek nise - helai kawng chho zauh a ṭul bawk. Emergency thilah mipui kalvel nen helai kawng hi a zim lutuk. MULCO hovin an thil siam zawrhna tur in te an sa a, Civil Hospital leh New Capital Com­plex main gate bulah dawr an hawng bawk a, eng condition-in nge dawr hi an siam? 

Referral Hospital hi an sak chhunzawm mek zel a, OPD hnuai luhna bul tual zawlte hi blacktop vat nise, Surgery leh inentirna dang pawimawh tak tak a tam si a, vaivut khu a lut nasa a, furah tui bawlhlawh a lut bawk. 

Kan awmna ward-ah khawl hmangin bang an verh a, a bengchheng hle. Damlo awm laiin khatiang kha tih tawh loh nise a duhawm ngawt mai.