ṬHI BEH LO THUKHAWCHANG

Kohhran leh YMA-ah chuan ṭha­hnemngai taka kan tha kan thawh mai bakah thawhlawm leh fund te kan thawh tel ṭhin. Politics-ah erawh chuan, "khawi khawi" tiin kan inchuh zo duak duak ṭhin.

Kohhran leh YMA a inhmang mihring kha political party-a a va tel chuan, a ngaih­tuahna kha a letling zawng chiahin ava pu ta daih a. Sap thawnthua Dr. Jekyll and Mr. Hyde ang kha kan ramah hian kan tam viau mai awm e.

Kan Political Party kalphung (system) nghet tak maiah chuan, mi ṭhatlohna, tlinlohna leh tihdik loh lai te a mualpho thei ang bera tlangzarh a, mahni ṭha ber anga inlantir kha a ni a.

Pathian thuah erawh chuan, "Mahni aia midang ṭha zawka ruat tur, sawisel suh u sawisela in awm loh nan" etc tih te kha kan chhiar leh ngaih­thlak ṭhin a ni lawi si!

Hnam anga 'nang nang' ti ṭhin khan Party-ah chuan "Kei Kei" tih a lo ngai ta tlat mai a ni. Hotute tlawn nan pawh 'ka pu' tih mai kan duhtawk zo ta lo; thingtlangpa thleng thlengin 'sir' kan ti puam ṭelh ṭelh ta mai chu a nih hi! Mahni tana zarzo tumin, "a lehpekah chuan anni hi an sawrkar ngei ang" tih rilru puin kan inteltualna Party-ah kan in lawmlut a. Kan hming ziah tirin, thang kan lo kam lawk ṭhep ṭhup mai ṭhin chu a nih hi!

Political Party hmanga kan ram khai­chhuah kan tum­na hi kum 70 chuang a ni ta. "Manifesto te hi chu kan inziah ṭhat siak mai mai a ni" tih kha tum 5 lai Chief Minister lo ni tawhin a sawi kha a ni a. Hei hian party system nghehzia a lantir awm e.

Political Party hmanga politics dik thlen tir tum chu, amah Pu A.Thanglura ṭawngkam takin 'pialtlepa liluh tum ang' a nih tak ber hi a.

C.Lalthanmawia (Athana) Bawngkawn South