Aizawl khawpui - Dark City

Mizoram - Swit­zerland of the East tih ang deuhin, duhthusamna thilah mi tu tute emaw chuan Aizawl hi eng hming hming emaw an puttir ṭhin a; ṭhenkhatin 'No Honking City' an ti, a ṭhenin 'City of Smile' an ti, a dangte pawh a la awm ang. Tun ṭum chu 'Dark City' han ti ve leh cháwr mai ila. Ka hmu thim hle mai! Tih chhan erawh ka nei ve.

Zanah, thimhlim ni lo, zanah ngei Kulikawn aṭangin tlangdung kawngpui zar zarah Bawngkawn thlenga kal/tlân ve fo in awm mai thei a; state khat khawpui ni ve si hi, kawngpui leh khawlai a thim ang reng viau tih in hmu chiang thei ang. Eng lai bik a awm teh meuh mai a, a tam berah erawh chuan a eng tâwk lo em em a, a thim a ni ber zawk awm e. Kawngpui dunga in nei mimalte'n an in pâwn lama êng an chhit zawng zawng hi awm lo phei se chuan, a eng lo zual hle dawn tih a hriat. Hei hi tlangdung kawngpui, kan kawngpui lûn ber a ni a, kawngpui pênhleh dangte phei chu a thim lehzual.

Zanah, thimah sual a inlár ṭhin a, thil sual ti tura khaw ênga inlan ngam lote inlar duh hun chu zan thim a ni. Aizawl khawpui, mi nuai thum chuang chênnaah hian mi fel leh ṭha tam tak an awm rualin, sual tak tak, pawisak nei lo tak tak, pawi khawih ṭhin an awm ve ṭeuh bawk. Chu'ng mite tan chuan Aizawl khawpui chhung kawngpui leh khawlai êng lo lutuk hi hun leh hmun duhawm a ni a; a lehlamah, mi dangte, a bikin nunau tan a rálṭi sawt thung.

Aizawlah hian mipuiin taksa sawi­zawina atana kea kal an uar tial tial a, a tam ber chu zingah kal bawk mah se, hun neih danin a zir loh vang leh chhan dan vanga zana kal ṭhin eng emaw zat an awm ve bawk a. Ṭul leh pawimawha kal chhuah ngai, lirtheia kalna nei remchang lote an awm ṭheuh bawk. Chutiang mite tan chuan zan rei pawh la ni lo, dar 8-9 velah pawh ni se, khawlai a ên ṭhat tâwk loh avangin a him loh palh a hlauhawm hle a ni.

Motor chung­changa India rama dan hman mekah khaw chhungah chuan motor êng (light) hi a chhun hniam chi (low beam)-a dah tur tih hi zirtirna kan dawn dan a ni. Mahse, Aizawlah zan lamah street light a en loh êm avangin motor leh kea kalte him tlân zawk nan a chhun thui chi (high beam)-a dah a ṭul ve ṭhin. A chhan chu, low beam hmanin kawngpui sira awmte emaw, kawng kân tur emawte hmuh lâwk a harsa tlat. High beam hman lahin, mahni tawk záwnga tlânte tan harsatna a thlen ve leh thei tho bawk si. Street light tlem vang vek.

Aizawl khawpui hian enkawltu AMC a nei. AMC hian kawng ṭhenkhatah chuan hna an thawk ṭha a ni mai thei; zan lama khawlai tihen kawngah erawh chuan an thawk chhia ka ti hle. Ṭang lehzual teh se. Phai lamah leh ram dangahte khawpui kawngpui dunga streetlight intlar ṭhût, mawi em em mai kan hmu ṭhin. Khawlai/kawngpui tiêngtu a nih piah lamah, zan lama khawpui chei mawitu a ni tel âwm e.

AMC-in mipui aṭanga chhiah an lâk a tam tham tawh viau niin an sawi a; chu'ng sumte leh Central aṭanga grant an hmuhte hmangin kan khawpui hi 'Dark City' a nih tawh loh nan zan lamah han tieng ût mai se, a va mawiin a va nuam dawn em!