Saruak la, a thuam ang che

Fapa tlanbo, tehkhin thu lar takah hian langsar deuh mai chu - a pa hnena a kir dawnah khan engmah a nei lo, tih hi a ni awm e.

A kal lamah kha chuan a pa in aṭang khan báwr ve takin, a thawmhnaw leh a ken chhuah duh zawng zawng nen, a ro chan ai (pawisa) nen, pir vahin a chhuak ta kha a ni a, engemaw chen chu nuam pawh a va ti phian a nih hmel. Pawisa a ngah a, ṭhian pawh a ngah a niang, an hlim hle ni tur a ni. Kan hriat tel tur erawh chu, hemi chhung zawng hian - a neih apiang kha hlihsakin a awm zar zar a ni. A pawisa a hek a, a tlâkchham tawpah phei chuan a neih sa bâkah a ṭhianten an ṭinsan vek a, engmah nei tawh hek lo, a thawmhnawte pawh kha ei tur lei nan a hralh hial ang tih a rinawm. Vawk in bula ṭàmchhàwl khawpin a awm ta.

Chuti fakauva saruak leh rilṭama a awm tâkah chuan vawk in bulah khan a harh ta thut mai a, tlawm leh zah sawi thei turin a dinhmunin a zir tawh ngang lo. Rilṭam leh saruaka vawk in bula thih a duh loh chuan a pa a pan leh loh chu duhthlan tur a nei lo. Pan tur dik pan tur hian saruak a lo ngai khawp mai. Ka hreh, ka zak, ka ngam lo... kan tih theih chhung hi chuan kan lo la mangang tâwk lo mai hi a lo ni a, engkim huam ngai khawpa kan dinhmun a chhiat hunah pan lam tur dik hi kan pan thei chauh a lo ni fo mai. Pum na riai riai satliahah chuan doctor kan pan lem lo a, mangan hunah erawh chuan, inchiu leh inzai hlau ber ber hi a nghakhlelah kan ṭang mai chu a ni.

Hmeichhe zakzum tak takte hi doctor hmaa an inphelh a ṭul hun chu an mangan hun, an hriselna thila pumpelh theih loh a nih hunah a ni a, zak ngawih ngawih chung pawhin, Mizo hmeichhe rilru dik tak pu, an khûp takngial pawh thup ṭhinte khan an zahmawh chhungril ber thlenga en leh khawih an phal a lo ṭul tawh a, an hnute a cancer palh ang tih an hlauhthawn tawh chuan, nula fel leh thianghlim tak takin zah an sawi thei tawh lo. An zak thei lo ta thut a ni lo. Mizo ngat phei chu, a theih chhung chu doctor pan duh lo tlat kan ni deuh vek. Zak, hreh, ngam lo tih zawng zawngin a ṭhulhtir theih loh khawpa ṭulna leh mamawhna-in min nawr hunah, 'saruak ngam lo thei lova kan awm hunah' pan tur dik hi kan pan ṭhin chauh a ni.

Mizo Kristian tam takin Isua pan kan tum dan leh, a hnen thlen kan tum dan hi, kan la saruak tâwk lo hian ka hre ṭhin a, thil dangah hian kan la beidawng lo êm a, kan la mangang lo êm a, saruaka Isua pan hi kan la hreh a nih hi. Fapa tlanbo ṭamchhawl dinhmun kha kan la hlat lutuk a, khawvel hian min la phelh ruak mek a ni. Hetiang hi chu khawvel hian a phelh ruak zel dawn a, beisei an neih chu beidawnna-ah a thlaksak zel ang. Fapa tlanbo anga khawvelin a phelh ruah tawh, saruak leh inngaitlawma Pa Pathian pantute erawh chu Anin a lo thuam lêt thung dawn a, ke ler aṭanga chhip thlengin a thuam ang a, a puar nan ruai a ṭheh bawk ang.

Fapa tlanbo khan a pa ina a haw khan thawmhnaw ṭha tinreng inbel sela, vul haw chúk mai sela, a vawk enkawl laite kha kai haw vel sela, sakawr tawlailirte 'hire' haw vel sela, a pa khan puan ṭha ber, zungbun, pheikhawka thuam nghalna tur leh sebawng no thau tak talhna tur order kha a siam ka ring lo. 'E... kha, i va la vul nasa teh chúk ve... i vawk rawn kaih haw kha talh ang hmiang... i account pawh a la full ang a... Engtia lo haw nge i nih? I u ka duat dan ang hi chu i beisei thei tawh lo aw' te a ti mai mai ang ka ring. Nimahsela, khawvelin a phelh ruah tawh fapa, pan tur dik pan, rilṭam bawk si kha a pa tan chuan neih apianga thuam tur a ni tlat. Khawvelin a phelh ruah, saruak nih inpawmte hi Lalpa chuan a thuam a, an mamawh a pe mai ṭhin. Amen.

RK Lianzuala