Hmasawnna hnuk Entreprenuership

Ram ropui tak takte hmasawnna dan kan thlir chuan hruaitu ṭha in a hruai vanga hmasawnna kawng zawh ṭan an ni. Sumdawng lian tak tak an inbun thluah a, chungah te chuan innghahna tlak hna ṭau a ṭet a. Hmasawnna chuan mimal tin a fan a, ram hmasawn an ni ta ṭhin a ni. Mahni intodelh chu mi zahawm a lo ni a, mi khawngaih nghak tura khawpa dinhmun chhiate tan zahawmna hian awmzia a nei ve tak tak lo; rilṭam chu a inthunun thei bawk lo.

Tunah hian Mizoram sorkarin a ṭang ngamte puihna tur business plan ṭha tak, ‘Mizoram Kailawn’ a ngaihtuah chhuak a, he thil hi hre lo tam tak an la awm a, mahni kea din tumte tan Planning office-ah ngaihven tur a ni.

‘Mizoram Kailawn’ thupui ber chu sum­dawnna ṭha in hriat siak a ni ber. He scheme-ah hian Politics a leng lo a, thawktute pawh sorkar hnuaia mi an ni lo a, mahni puala din khaw chhuah tumte kalna tur hmun dik tak ni.

Hmanah chuan Mi­zoten driver kan ngai­sang a, a hnuah engi­neer-te an vawk lal len a, tichuan doctor an luck leh a. Tunah chuan mi kan fing tawh a, ngaihsan tur dik kan hre ṭan; vawi khat eia zo mai tur sangha aiah sangha manna tur len thlang ngam, entreprenuer lama mi hlawhtling te hi khawvelin a ngaihsan rawn mek a ni.

Vawi tam tak lo hlawhchham tawh, Chinese zinga hausa ber ni ta Jack Ma chuan, “Zawngte hmaah hian pawisa tam tham tak leh balhla dah la, zawng chuan balhla a thlang ngei ang. A chhan chu pawisa hian a dam chhung pawha a ei sen loh tur balhla a lei thei tih a hriat loh vang a ni,” a ti. Tichuan, Mizo ṭhalaite zingah hna leh sumdawnna-ah an duh thlan tir ta ila, hna kan thlang deuh fur maithei; a chhan chu mi tam zawk hian kan neih theih ngai loh tur sorkar hna ringawt kan melh a, sumdawnna bul ṭanin sorkar hna thawk tam tak hlawh aia tam mah thawk chhuak turin theihna kan nei tih kan hriat loh vang a ni.

Mizo ṭhalai te hian zirnaah chauh hian ei hmuhna tur a awm niin kan ngai a, kan hun ṭha zawng zawng zir nan kan hmang a, a pawi hle. Lehkha thiam thei fal te chuan zir zel se, a nawl pui erawh chuan eizawnna ngaihtuah nachang kan hriat a hun; a chhan chu hlawh hi intodelhna tlak a ni a, eizawnna ṭha erawh chu hausak pui tham a ni.

Kan inchuh nasat ber sorkar hna hi hlawha lungawi lo te awm khawmna a ni. Lehkha thiam takte hi hna ṭha tak thawk tur an ni bik chuang lo a, Law student ṭha tak hi Lawyer ṭha ber an ni chuang lo. Lehkha hi zir loh tur ka ti a ni lo; mahse i lehkha zir khan nangma puala huai­sen leh taima taka ei i zawnna tur dal suh se.

Mizoramah mahni kut kawiha eizawnna tur a la tam lutuk. Bur­ma aṭanga bungraw lo kal, Mizorama kan siam chhuah ve theih, kan tih si loh pawh hi hausak pui tham a tam lutuk.

Mizo zingah kum 40 pel tawh zingah school kal laia mark hmu hnem thei tak, “Saw pa saw lehkha a thiam ṭhin asin aw... mahse ti sawn a awm vel ta mai mai a....” tih tur an tam hle. Hna ṭha kan nghah chhungin mi fate an lo hausa hman a, tlai khaw hnuah kan thawh duh loh thawka din chhuah pui ta te kan awt leh si. Mahni puala eizawnna (entreprenuership) hi i hlamchhiah lo ang u.

I class room kha i khawvel atan chuan a zim lutuk; khawvel hi i inzirna hmun (class room) ni zawk rawh se.

Ramhmangaiha