KHAWVEL CHAWKBUAITU VIRUS

Tunlai khawvelin a buai­puiber mai chu Covid-19 hi a ni awm e. Ram ropui America meuh pawh an buai hle a ni. Ram leh ram innghirngho pawh an kalpui hleithei tawh lo a ni ber e. Khawvelin he virus hi a do rawn a, ralthuam nei ṭha leh ram ropui pawh eng ual an ang lo. Ralthuam ṭha leh changkang taka do theih ni se zawng do hneh tak tak an awm ngei ang. Tunah zet zawng, a ram hausa leh ralthuam nei ṭhate an buai zawk emaw tih tur a ni ta. Hei hian khawvel finna leh thiamna nepzia leh tihtheih a neih tlemzia a tilang chiang hle mai. 

Kan ramah meuh pawh a lo luh hma hauhvin kan buai a, ei tur inchhek khawl leh himna zawngin kan hmanhlel tan der chu a ni. A pawimawh ber pakhat chu kan sorkar hotute hmalakna thlawp a, mipuiten thuawih taka tih tur leh tih loh turte kan zawm ṭhat hi kan himna pakhat chu a ni phawt mai. Lo inlak pa emaw, lo intih huaisen vak pawh a sawt hmel lo; chutih laiin mipuite tithlabar zawnga zoram mipui kan sual tawh lutuk a, Pathianin min hrem dawn ti emawa lo intih thlarau mi vak pawh a sawt hmel chuang lo. Chumi rualin he mi denchhen a, hre hmasatu nih tum lutuk te, thu dik a nih leh nih loh pawh thlu lova lo puangzar sektu nih hi mahni mawnghlimna mai a ni bawk. 

Hetiang hun harsa tak kan tawh lai hian a pawimawh ber mai chu Lalpa hnaih hi a ni. Davida chuan “Keia tan zawng Pathian hnaih hi a ṭha a ni” a lo ti a. Lawm lai pawhin lungngaihna a lo thlen pawhin a famkimna thlentu chu Lalpa hnaih hi a ni. Sam ziakah chuan “A tuite chu ri hum humin phul bulh bulh mahsela; a fawn nasat avangin tlangte chu tuifinriat chhung daihah insawn mahsela kan chuan lovang...” a lo ti a. Natna leh thihna hneha tho leh Lal Isua neitu nih hi ava thlamuanthlak ṭhin em! Mimal, Kohhran leh pawlten nasa takin Pathian kan au va, Lalpa hian a thlawnin a ral tir lovang. Lalpa hmangaih zofate hi, Lalpan kan boral vek a phal ka ring lo. 

Kohhran inlak hranna te hi dah ṭha ila; inthurualin Lalpa i au ang u. Mizorama kan harsatna fo ṭhin pakhat chu - Kohhran feeling nasa lutuk hi a ni. Hei hi kan paih deuh deuh a pawimawh. Hei hian ramthim lama kan rawngbawlna thlengin a nghawng ṭhin a ni. Kohhran a hausa emaw, a ropui vanga induh emaw, inchhuang thei tumah kan awm lo. Kan rina chu Isua tho a ni a, kan innghahna thurin bulpui a ni. Pathian ropuina aia kan Kohhran emaw kan dah ropui zawk a nih palh hlauh chuan Kohhran lu leh inghahnaah kan chiang lo tihna a ni. Kohhranten inthuruala Lalpa kana uh chuan kan ram hi chhanhim a ni ngei ang. 

Coronavirus chuan eng ang pawhin khawvel chawkbuai mah sela, heng natna leh hrite chunga thuneitu Isua kan neih avangin; amahah kan innghah tlat chuan a ropuina leh a chhanhimna chu kan chang dawn a ni. 

Mak taka ti ṭhintu Pathian, natnate tidam a, mitthite kaithotu; Isarael fate pawh an bawhchhiat laia Pathian an auh avanga hmelma laka chhanhim ṭhintu hian Zofa, theihpa tawpa theih ang anga atan ke pen ṭhinte ṭawngṭaina hi a chhang lo ang em ni? Kan ramah hian Pathian ringlotu aiin ringtu kan tam daih zawk tih hi i hre thar leh ang u.