Biak in khar nge khar loh?

Zoramah Coro­navirus vangin Biak In khar leh khar lo kan awm ta nual mai. Ṭhenkhatin a kharte an ngainep lek lek a, ṭhenkhatin a khar ve lote an dem lek lek thung. Uluk taka ngaihtuahna sen a hun hle mai. 

Biak In khar hi dawihzep vang ni loin sorkar thupek ngaihpawimawh vang leh mipuite himna tur duh vang a ni a. Chatuana khar tura tih pawh ni lovin khawvela hrileng a nasat lai atan chauha tih a ni. Tun dinhmunah kohhran tam ber chuan April thla laihawl thleng atan chauh Biak In khar an rel a ni. 

Kan hmuh leh kan hriat angin hrileng nasatna ber China-ah pawh an fimkhur avangin ziaawm lam a pan chak hle. Hetiang zela hma an sawn chuan hrileng pawh hi a tawp ve maiin a rinawm. 

Keini ramah pawh kan inven 

ṭhat a, ṭawngṭaina nen kan ṭan tlat chuan kan him ang a, Biak In pawh kan la hawng leh thei maiin a rinawm. Kan inven ṭhat loh erawh chuan... ngaihtuah ngam pawh a ni lo. 

Tun hun hi Mizo mipuite ṭanrual hun dik tak a ni. Mithiamten hrileng danna atana ṭha tih an hriat chian sa, puipunna leh mipui punkhawmna lam chi reng reng khap a ṭha tih an sawi hi mipuiten zawm tlang ang u. 

Tuna Biak In kan khar hi tun hmaa ram danga miten an rinna a tlak hniam avanga Biak In an khar ang ni loin, khawvel dinhmunin a zir loh vanga khar a ni tih hria ila. A khar ve lote pawhin sorkar thu zawm hi kan ṭhat tlanna tur a ni tih hria in thluak fimin ngaituah nawn hram ang u. 

Mipui mimir hrim hrim pawhin chhuahvah leh teihawi nasat te hi insum bawk ila, chu chuan nasa takin kan invenna kawngah min pui ngei ang. 

Kan inven uluk loh vanga kan ramin a tuar a nih chuan tuma'n a mawh an phur dawn lo - a tuartu tur chu kei­mahni tho kan ni. 

Dam kan thlahlel ve tawh lo a nih pawhin kan chhung te, kan ṭhiante vang tal pawhin fimkhur hi kan bat a ni tih i hre tlang ang u.