College zirtirtute leh Assignment

Hman deuh khan College zirtirtute hian an naupangte tana ṭhahnem ngaih thilah thu sawi turin politician te leh mi chi hrang hrang, sumdawng, milar te leh zaithiam te pawh an college a thusawi turin an sawm ṭhin a, ṭha ka lo ti viau mai a. Mahse a hnu lawkah Higher & Technical Education Department khan college a thusawi tura pawn lam mi college-in an sawm 

ṭhin chu ngaimawhin khapna thupek a chhuah a, a mak viau. 

Hetiang an tih hian zirlai naupangte chu kawng ṭha lo lamah, rilru la peng thei thil a awm an hlau ni awm tak a ni. 

Hetianga pawn lam mi thusawi tura college-in an sawm hi a ṭha em em a, college naupangte pawhin kawng hrang hrangin an hlawkpui ngei a rinawm. 

College ṭhenkhat phei chuan MNF movement chungchang sawi turin MNF President an sawm hial kha a ni a, a duh duh a sawi mai a ni. Pawn lam mi sawm hrim hrim hi chu thil pawi a ni lo turah ka ngai a, mahse party dang beihna lam an sawi emaw anmahni leh party tana fing kherek taka chet la a thusawi chingte an awm erawh chuan chawp leh chilh pawhin anmahni sawmtu zirtirtute ngei hian an khap ngam ve thung tur a ni. 

Ka sawi duh ber zawk chu tun hnaia college ṭhenkhatin an naupangte assigment an pek chungchang hi a ni lawi a! 

Kan hriat ṭheuh angin tun hnaiah Coronavirus vangin mitin kan fimkhur tlang a, sorkar pawhin fimkhur tura min ngen ang leh tih tur leh tih loh turte a sawi avangin kan zawm a ngai a, chutiang chuan a him thei ang bera kan chet hun lai a ni. Hetihlaia college zirtirtuten an sikul naupangte assignment an pe hi a ṭha a, hun awl an ngah ang a, ṭha takin an ti thei turah a ngaih theih a ni. 

Amaherawhchu, assign­ment an pek bakah hian college zirtirtute hian zirlaiten assigment an tih zawhah assigment hi online a submit emaw sikul luh huna submit tura emawa ti loin zirtirtute hian anmahni dawhkanah ngei assigment hi thehlut turin an naupangte hi an ti nia sawi a awm. He thil hi a dik a nih ngat chuan zirtirtute hian an thuneihna hi an hmang sual a ni awm mang e aw, ka ti. 

College zirtirtute hi an hlawh a sang a, an zirlaite lakah pawh thuneihna sang tak an nei ngei mai. Amaherawhchu, tun ang Coronavirus vanga tawmim tura sorkar leh veng chhung lam pawhin ngenna na chhuah fo laia zirtirtuten an dawhkanah ngei assigment submit tura an ti nia sawi hi sorkar thu chhuah, college leh hmun khata pung khawm lo tura min ngenna kalh a ni. 

Hetih lai hian College zirtirtute hian tun ang boruak­ah anmahni dawhkanah ngei college naupangten assigment submit tura sawi hi thil awmzia rawn sawi chiang se a ṭha ngawt mai.