Covid 19 LEH TLANGSAM

Kan khaw mi leh sa ZMC-a boral chungchangah titi a tamin social media-ah thuthang dik tawk lo vawrh darh a nih avangin Tlangsam mipui bakah Champhai mipuite leh Mizoram mipuite kan chiai a, thin phu dep depin test result kan nghak ṭhup a, Zoram mipuiin Tlangsam lam a hawi ṭhup a nih kha! 

Hetiang thuthang a awm tirh khan ka awih chiah lo va, a sawitute leh min zawttute hnenah pawh heti ang hlir hian ka lo chhang a. (Rinhlelh a nih thu leh test a nih thu ka la hre lo.) 

“Sorkar hian keini aiin a hlau zawk a, Damdawi in emaw Sorkar emaw aṭangin fimkhur tura ngenna kan dawng em em ang. Rinhlelh a nih chuan heti maiin a ruangin Damdawi in a chhuahsan a rinawm lo. Fimkhur chu a ṭha mah se, hlauthawng lo phawt ang u," ka lo ti vel a. Rinhlelh a nih thu leh test result nghah mek a nih thu ka hriat hnu kha chuan a hlau ber ka ni ang. Hlauthawng tak ka ni. 

Ṭhenkhatin positive tih confirm a nih thu sawiin Tlangsam mi leh sate chu nilengin, test result chhuah hma zawng kha chu min thinhrik hman lek lek. Tlangsam khaw taxi phei chuan passenger a hmu lo deuh hial hman an ti. Result la hre lovin khua var ngat phei se chu Tlangsam nu hovin Bazara an thil zawrhte an hralh thei lo hial ang. Tlai lamah pawh an hnawng hman tak tak. 

Thaw dep depin result kan nghah chhung chuan, "Tlangsam mitthi khan Covid 19 Symtom zawng zawng a nei a, rinhlelh a ni. A enkawltu Damdawi ina thawktute leh a chhungte quarantine tur an ni..." 'ZMC-a thawkte'n highly suspected a ni' an ti...’ 'Champhaiho chu lo chhuk tawh lo mai se...' 'A kuang hawng lo turin Damdaw in lama thawktute'n an ngen a, mahse a an hawng,’ tih thu vel kan hriat ngat phei kha chuan Tlangsam khua hi a hnim deuh ruih a ni ber. Hlau lo an awm ve nual tho. 

Kan ṭhian pakhatin min rawn phone a, 'Chanchin lo ngaihven teh aw... Ka nupui leh ka fate pawh inah ka hawtir vek tawh... In thawmhnaw thlak vek u la, inbual fai nghal vek ang che u. Pawnah chhuak tawh reng reng suh u' ka ti e, a rawn ti a. (Result duhawm lo lo thleng palh se chuan a him pawl an ni maithei) 

In ka luh rualin inneihnaah ka pa a kal tih ka hre chhuak a, ka u nen chauh an lo awm a. Result hi lo positive palh ni ta ang se... mitthi ralnaa kal zingah inneihnaa kal an awm dawn chiang si. 

Pa ber hnenah chuan, "Vawiinah tunge i ṭhutpui?" a la hre lo zui! “Khawi khawiah nge i kal?” A sawi dan dan a. Mi ṭhutna hnuahte i ṭhu awm si... Kan hlauthawng deuh si... Kan nuih a za deuh bawk si... Kan unau hnihin kan han sawi dun a. Kan inkhung hrang mai dawn nge? Chhung inkhawmah pawh kan inṭhut hlat hlawm viau! Chaw erawh dawhkan khatah kan kilho. 

Zanah YMA in emergency meeting a kova, meeting boruak chu delhtu a lian bawk a, rit elh elh tak a ni. "Result nghah chhung chu pawna chhuak lo turin mipui kan hriattir mai dawn em ni? Palh awm vaih se chuan Mipui zatve hi chuan kan kai a ni deuh thaw tawh mai a ni si a, result duhawm kan dawn tak leh a lawmawm lamah kan ngai mai dawn em ni?" tih kan ngaihtuah laiin a result a negative tih kan han dawng mai chu kan thaw huai a, boruak min delhtu a bo zo va, kan nui ve thei ta. Hlimawm tak a ni. 

Result nghah ni kha ni khat rei ber a ni hialin ka ring; rei tak a ni, rei tak. Result kan hriat chian hnua kan han thlir let chu thu hlimawm tak tak a va tam tak. 

A chung lama ka sawi tak ang khian heng zawhnate hi ka nei:

1.     Rinhlelh vanga test ni si, test result chhuah hmain engatinge a ruangin Damdawi in a chhuahsan?

2.     Test result nghah chhung tal engatinge a nupui leh a enkawltute quarantine an nih loh? (Result duhawm lo thleng se mitthi in 

aṭangin a darh huk dawn tihna)

3.     A ruang thlenna tur Tlangsam khawtlang hian rinhlelh lai a nih thu leh fimkhur tura ngenna a dawn loh? (Kai vek mah ila pawi an ti lo zawk nge?)

Chhanna : Ring lutuk lo chungin an test a ni thei mai ang a. 

Khang thil thleng zawng zawng khan fimkhur a ngaihzia a tilang chiang hle. Ral khel dar vawtuah ngai ila, mipuite'n fimkhur lehzual phah nan hmang hlauh thei i la a duhawm hle mai. Mahni sahimna zawnga theihtawpa lo inbuatsaih lawkte kha nuihzat chi an ni lo. A ni leh chuang lovang tih vanga mawl taka hlauh loh tawp ai chuan thil thleng palh awm thei a ni a, fimkhur hle ang u tih zawk tur a ni. 'Nimina kan awm dan ang khan fimkhur ṭheuh i la, kan ramah hian lo lut palh pawh nise a darh chak awm lo mang e' te ka ti. 

Chung lam khian Mizoram tan hian dai min theusak hram se. Kristiante Pathian hi a dik a ni tih hi India leh khawvel hriata pho chhuah a nih theih nan Mizoram hi him pial mai ila ka va duh tak a ni.