Rawn leng rawh u...

Mizote hi damlo kân a, chiattawk inlen pui ṭhin hnam kan ni. Dinhmun ṭha lo zawk a ngaihte thlamuan leh chhawmdawl hi pi leh pu aṭanga kan chhawm niin, he zonun zemawi hi Mizo nih ti nuamtu pakhat a ni chiang. Kan khawngkhar kiktu an awmin, rawn leng rawh u tiin kan chhawn a, mikhual leh inleng laka ṭhat chhuah ṭhin hnam kan ni.

Damlo an awm changin, veng chhung ṭhenrual ṭhate an bengvar a, kan dinhmun hre turin kan inngaihven tawn em em ṭhin. Duhsakna thil pek ei leh in tur bakah pawisa kan inpe tawn a, midang tana malsawmna nih hi a hluin a ṭha takzet a, a kristian hle a ni.

Mahse, mipui an thuhmun fo thei lo tih ang khan. Damlo ngaihsaka kân tute mizia leh duhdan a inang vek lo. A bik takin damlo nazual deuh kântute hian a boruak a zirin thil awmdan thlir thiam a pawimawh a, awmdan pawh thiam a ngai hle dawn niin a lang.

Damlo chau tawh tak hian mipui huhang an zo lo a, midang kawm tura thawh harh an peih loin ṭawng an harsat thei hle. Damlo kântu zingah, mipui thinrimin 'pawi khawihtu hmel hmuh kher an duh,' an tih ang maia a damlo hmel hmuh kher duh, an dinhmun ngaihtuah sak lem lo taka titi pui phet tum an awm ṭhin. Heng mite hi an tlawmngaihna a hlut viau laiin hnawksak an nih theihna chen a awm awm e.

Damlo dinhmun hre tura kalten an mahni aṭang kher ni loin, an chhungkhatte hnen aṭangin an chanchin kan hre thei a nih chuan lungawi thiam ila, a theih chuan zuk leh hmuam insum nachang hria ila a dawngsawngtu tan a hahdam thlak hle ang.

Hman lai aṭang tawhin, chhiat tawk an awmin tlangval tlawmngai ten khawhar an riah pui a. Inriakte chuan chhiat tawk chhungte kha tui an chawi sak a, thing tuah lak sakin hna thawh tur ṭum dang awm apiang an thawh pui ṭhin. Rilru thlabar leh mangnang an thlamuan bakah, an hnathawh tur ṭul ang zawng zawng an thawh sak avangin, chhiattawk chhungkaw tan an thlamuan pui awmin, hahdamna tak a tling - an hlu takzet a ni.

Amaherawhchu, nunphung a danglam a, kan khawsak dan leh mamawh lakkhawm dan pawh a danglam chho zel. Kan eizawmna pawh a inang tawh lo hle a, rilru sutthlek pawh a ngai reng thei ta lo. Thawkkhat laia Aizawl veng pakhatin khawhar in riah an tih tawp khan sawisel leh dem a hlawh nasa hle! Mahse, veng chhung hruaituten an dinhmun ngun tana an ngaihtuah hnua an thil tih a nih avangin an thutlukna an thlak lo.

Hun a inher zel a, tunah chuan Aizawl veng chhung tam zawk hian khawhar in riah an titawp ta ni berina lang. An duh leh duh loh an zawt tlangpui tawh a, a tam zawkin inriak neih an duh tawh lo. Kan nunphung hian kan Mizo zia ṭhenkhat kha a herliam pui mek, hei hian a ṭha lai a liampui vek tihna erawh a ni bik lo; a aia ṭha leh tunlai mil zawk ṭhenkhat a her chhuah pui ve mek bawk.

Chhiat tawk kan awm in, a tuartu chhungkaw lamin khawtlang tih buai kan hrehin kan inthlahrung thei hle. Vantlang phurrit ni lo thei ang bera insawngbawl kan duh ṭheuh a, chutih rualin a mipui pung khawm lamin harsatna kan siamsak fo ṭhin niin a lang. A bik takin motor kawngpui bula khawsate tan traffic tih khaihlak a nasa ṭhin hle a, hei hian hun leh tha, sum leh pai tam tak a luanrualtir niin a lang.

Veng ṭhenkhatah chuan Kohhran/ YMA Hall-ah mitthi an in vui ve mek tawh a, hei hian kawng hrang hrangin awlsamna min thlen zawk niin a hriat. Mimal inah chuan mipui kan leng tam lo a, a bik takin mi in luah leh in lian lo tan a luhai thlak zual ṭhin. He tiang nikhua hian kawngsir leh mi bathlar vela lo titi nileng mai mai tawk an awm ṭhin.

Hall-a hun hman a nih erawh chuan mipui kan ṭhu hnem theiin, a felfai hle a, a bik takin traffic chungchanga buaina thleng ṭhin a pumpelh hle bawk; nakin lawkah chuan mahni in lum ngei aṭanga inthlah liam hi kalsanin, remchan zawkna vang­in Kohhran/ YMA Hall lama invuina hun hman hi kan in­tih­hmuh zelin a rinawm ta zawk.

Lalhmangaiha