Lirthei intlanchhawkin min chhawk em?

Aizawl khawpui traffic jam tih zia­awm nan Mizoram sorkara traffic management committee-in a rawt angin, nikum October thla tir aṭang khan ni (day) leh number tawp ber inang tlan loh ni ah hman a ni a, hei hian traffic jam min chhawk em? A ziaawm viau ti an awm laiin min chhawk lem lo nia hria an awm bawk.

Mizoramah hian lirthei a pung chak em em a, a lei thei dek dek chuan an lei pawp pawp a ni ber. Chhungkaw khatah lirthei pakhat aia tam mamawh lem lo pawhin an neih han show ve hrim hrim nan nge maw ni, a chhuak thar a piang lei thei an tam ta hle.

Aizawl khawpui kawng a ṭhang si loh laia lirthei pung chak lutuk hian engti kawng mahni traffic jam a tih ziaawm a rinawm loh.

Number tawp leh ni (day) inmil an din ni siam a ni hi zawm a hlawh viau laiin hre loh palh leh hai palh an awm nawk mai. Chumi karah chuan tlan lui hram an awm nawk bawk.

Heng ho lakah hi chuan dan lekkawh huai ngam a ṭha hle. Dan palzut an tam hian dan pawh a zahawm lo a, chu­vangin heng ho lak­ah hi chuan rik deuh ṭhak ṭhak a ṭha ang.

Tuna kan intlan­chhawk hian traffic jam chu a ti ziaawm viau mai, mahse sawi tawh ang khan kawng a ṭhang mang si lo a, lirthei a pung zel bawk si a; hei aia ziaawm tur chuan ngaihtuahna thar la hman leh a ngai ngei dawnin a lang.

Chuta tan chuan lirthei number kawp kim leh kawp kim lo, entir nan number pahnihin a sem theih loh No. 1, 3, 5, 7, 9 a tawpa awm tlan ni te; number tawpa No. 2, 4, 6, 8, 0 ang tlan loh ni te siam ni ta se kan ziaawm leh hmel hle.

Tunhnaiah Bible House bul a tlahniam a, leihlawn siam mek a ni a, lirthei kal a buai phah hle. Pumpelh theih loh harsatna a lian hle a ni. Tunah hian Bawngkawn junction chu sorkarin mimal ram a lei a, kar khat lai siam a nih mek tak avangin he kawng hi block a ni a, Ramhlun kawng lama lunin traffic pawh a ti jam nasa ṭhin hle. An siam zawh hun a nghahhlelhawm takzet a ni.

Chuvangin, mipui mimir lam pawh kan insum a, mahni lirthei khalh chhuak kher lo a public transport ho hi hman ṭangkai a ṭul ta viau.

Tunah phei chuan two wheelers taxi a tam tawh a, duhna hmunah a kal zung zung thei tawh a, uar deuh deuh pawh a ṭha hle a ni.

Lal Rinmawia