Tun hi...

Tun hi hun khirh leh pawimawh tak a ni. Hri hlauhawm takin hnai takah min chhaih mek a ni. 

Tun hi hruaitu fing leh huaisen kan mamawh lai tak a ni. Ram, khawtlang leh kohhran hruaitute u, tun hi mipui lung­awina leh lung­rualna zawn dip dep hun a ni lo, thil ṭha tur nia in hriatah chuan huaisen taka thuthlukna pawimawh rang taka siam hun a ni e, mipuiin kan ngaichang che u. 

Tun hi mithiam­ten mipui min kaihhruai hun lai tak a ni e; hetiang hun khirh takah hian in thiamna mipui tan in hmang lo a nih chuan kan la dem khawp ang che u. 

Information rin­tlak khawn khawm ula, ngaichang ula, mipuite min hrilhfiah ula, kan hriatthiam phawt chuan thu kan awih zel ang. 

Tun hi mimawl ngawih hun a ni; social media hian mitin tan ngaihdan puan chhuah theih­na min pe a, hun dangah thu dangah chuan kan zalen e, tun erawh hi chu hripui vei huk a thih puk theihna a nih avangin mahni ngaihdan dah ṭha in mithiam zawkte ngaihdan leh hruai­na ngaihchan hun a ni rih e. Mahni ngaihdan tlachawp puan chhuah zung zungna hun a ni rih lo - insum ang u. 

Tun hi mipuiin hruaitute thu kan awih dial dial hun a ni e, mahni maia khawsa kan ni lo, midangte nena inzawm tawn vek kan nih avangin thuawih hun a ni. 

Mi pakhat lek thuawih loh avangin tuarna nasa tak a thleng thei. 

Tun hi mahni hlawkna remchanga hman chi a ni lul lo e; sumdawngte chu an sawi zing tawh. Politics thilah hlawkpuina zawng suh, opposition tan sawrkar sawiselna remchang zawnna hun a ni lo, sawrkar lai tan mahni party infak pawr velna hun a ni hek lo. Kan zavai a ṭan­rualna hun a ni.

Rawngbawltute u, mipui rilru phawk­lek lai chuh a, mi bengverh zawng thu mak hmanga intihlar leh mi hip tum hun a ni lo. 

Tun hi midangte ṭanpuina hun ṭha a ni. Midangte tana malsawmna ni thei tura Pathianin malsawmna a pekte tan kan bul velah puih ngai an awm em? tih ngaihven a hun a ni e. 

Tun hi chhung­kaw nun hlim taka hman hun a ni e, chhung­kaw nun tuai tharna hun ṭha tak a ni e.