Chhim mipui harsatna in hmu lo der hi kum 2023-ah a pawi thei

Kan pute hian RT-PCR khawl min bun sak duh miah lo hi Lunglei mipui leh chhim mipuite hi eng angin nge min hmuh? tih hi rilru chhungril ber thlengin kan inzawt kan inzawt ta.

Keini tan chuan ṭul bila RT-PCR test result kher an phut (demand) na thilah chuan Aizawla kan kal hnuah Falkawna a hranpaa test ngai reng mai hi kan sorkarin harsatna min siam luih sakah kan ngai. Lungleia RT-PCR labo­ratory bun duh loh nghawng hi a na ngawtin a rinawm.

RT-PCR khawl petu Opposition MLA a lo ni kher kher pawh hi Lunglei tan chuan vanduaina a ni tawh. Phal taka pe pawh ni se an hman duh loh avang hian a petu hi MNF MLA kan neih te hi lo ni zawk se, kan ti, mahsela kan MNF MLA te hian RT-PCR khawl pek chu sawi loh Aizawla an pute hlauh vangin TrueNAT khawl an donate sup sup a, hei hi chuan Chhim mipui rilru na hi a tuam dam zo tawh dawn si lo.

Tuna thil harsa ta ber chu kan tu leh faten an zirna hmun an pan leh ṭan ta a. Vairam Hostel-ah chuan RT-PCR Negative Certificate an lo demand a, Job Interview ṭhenkhatah pawh RT-PCR Negative Certificate an demand a, chumi tur chuan Aizawla va kal vang vang a ngai a ni. Mi tam tak tan chuan a hranpaa ZMC a test tur ringawta Aizawl aṭanga kal leh pawh hi thil harsa tak a ni. Ka hmelhriat ṭhenkhat chuan Lunglei aṭangin zingah kalin Falkawna ZMC test nang turin an chhuak a, Aizawlah result nghakin an riak a, a tuka Lengpui Airport aṭanga zin chhuak lehte pawh an awm.

Hei hi Lunglei-ah tih ve theih se chu, Chhim lam mipui Lawngtlai District leh Siaha District mipuite hian an chhawr thei dawn a ni. RT-PCR Laboratory din hi thil hautak leh man sang uchuak tak chu ni se Chhim mipuite hian kan sorkar hi a hranpain kan va nawr buai lo tawp ang. Mahsela Sikkim, Manipur, Meghalaya, Tripura etc pawhin pakhat aia tam a ṭhen chuan pangate an nei thei a ni.

RT-PCR Laboraroty awmna Motor pawh an lei thei a, hei hi thil harsa a ni lo tih a chiang reng si a, Chhim mipui hi min hrek char char a nih chuan kan Pute thil tih dan hi kum 2023 ah chuan a pawi an ti ve ngawt ang le.

Khelmual in siam sak leh grass phah vel hian min chhandam dawn lova, kan rilru na hi a dam dawn lo. Inthlan hnaih dawnah cheng nuai 3 an tiam hi rawn sem pawh ni se a pawisa la chunga RT-PCR Laboratory thila chhim min ngaih pawimawh lohna hi kan hre reng dawn a ni.

Kan pute hian chhim mipuite hi Mizo­rama mihring ve tho kan ni tih hria se, in en hranna awm lo se. Kan Health Minister pawh hi Lunglei pa a nih ṭhin kha min theihnghilh hma mah mah a ni.

Mamawia, Lunglei South