'Where As' thar tura rawt duh ka neih ve chu...

Mizoram sorkar chuan September 18 hnu lama Covid-19 inkaihhruaina a la tichhuak lova (He thu ziah lai September 14), chuvangin mahni vei zawng au chhuah pui ve ila.

1. Aizawla lirthei intlan chhawk hi tuna mi ang hian chhunzawm ni rawh se. Mi tam takin an ngaih theih loh ber chu lirthei intlan chhawk hi a ni, mahse hei hi mipui zi hut hut tur venna ṭha ber a ni. Lirthei tlan loh ni hian hnathawk duh chu an chhuak hman tho a, hnathawh banah an haw leh hman tho. Chhunah emergency a awm chuan taxi leh two wheeler taxi an awm reng a, anni hi Covid vanga Lockdown tuar nasa ber an ni bawk nen hmangtu an mamawh. Chuvangin, tuna lirthei tlan dan hi tihdanglam a la ṭul lo.

2. Dawr inhawn chhawk dan hi tih­danglam ni se, a hmaa A, B, C hmanga ṭhen ang khan ṭhen leh ni rawh se. Tunah chuan hardware inhawn loh ni, thawmhnaw dawr inhawn loh ni, lehkhabu dawr inhawn loh ni tawp tawpin a awm a, a buaithlak zawk bakah hri leng karah a hlauhawm zawk. Entirna atan thawmhnaw dawr chu hmun khatah a lo awm deuh vek si a, A, B, C-a ṭhen loh chuan an hawn ni khan mipui an pungkhawm a, hri a darh a hlauhawm zawk.

Nepnawi leh nitin mamawh zawrhna dawr hi zingkar chiah hun pe tawh lovin A, B, C hian huam mai se. Inhawn chhawk se, hawn loh ni nei se, tuna zingkar chauh hi chu chhuna mamawh lam duhin a buaithlak bakah mahni veng ni lova hetiang dawr neite tan hawn leh khar hun a buaithlak.

3. Zan Curfew hi a ṭulna a la awm em ni le? Kan la duh ṭalh a nih pawhin zan dar 9-ah hian ni tawh se. Dar 7-ah hi chuan hnathawk ṭhenkhat an la haw hman lova, duty an lo khirh phei chuan patlingin nilenga inhlawha a hlawh chhuah hi haw kawngah Police-in curfew bawhchhiat vanga an lo chawi tir chuan a zo leh nghal zel a ni. Zan curfew hi chhuna curfew tel si loh chuan hri hi chhunah a lo darh fel hman tawh thei a, zana ven leh hi chu a thim bawk sia hmuh a harsa tawh lo maw?!

4. Task Force hi veng/ khaw tam takah an tha a ṭhum ṭan. Anni hi hlawh nei lova inpe an ni a, eizawnna lamah an ṭul ve tawh bawk nen sorkar hian Task Force chhawk zangkhai dan ruahman tawh se.

5. Inkhelh theih hi a ṭangkaina ka hre lo. Exercise lak hi phal se, a inkhelh phal hi chu inkhawm phal loh nen a inkalh tlat. Picnic Spot pawh hi hawng tawh se, mahni tana risk vek kan nih tho avangin a ngam ngam chu picnic tawh se. Picnic Spot neitute leh thawktu sum hrek chhung hi a rei ta lua e. Picnic Spot pawnah hri hi kan inkai darh tho tho avangin hri vang chuan khar ni tawh lo se.

James Laldintluanga