An zak lem lova

Khehpuam hmanga inti milian an nih chu an zak lem lova. Sorkar officer eiru nih leh an hlawh phu lova in leh thil dang nei an nih chu an zak lem lova. Sorkar hnathawh laia thawhpui midangte dipa mahni invulha intih len chingte an awm a, an zak lem lova. Sorkara project hrang hrang siama mahni hnathawh sawi zuah zuahte pawh an zak lem lova. Vote zawnga MLA-a in candidate tuma an sum neihte hmachhuana chet ṭan pawh chu an zak lem lova.

Aizawla pa chal lang ve tak pakhat chuan, “WhatsApp group pakhatah hian ka awm ve a, mi thil hre tak takte an awm ve a. Chutah chuan Khehpuam chungchanga hming­chhe tak mi pakhat chuan Khehpuama pawisa siam a nih thu an sawi chu a pawm hmiah a, ‘damdawi kan tawlh a, ruihhlo kan tawlh lo, dan anga man theih pawh kan ni lo,’ ti lam hawi hian Whatsapp group lian takah hian a sawi ngam nia,” tiin a sawi, an zak lem lo a ni. He pa hian Aizawla damdawi zuar zingah hian khehpuam pseu­doephedrine hi an drug license hmanga tam thama tawlh an awm nual thute a sawi lâng lâng a nih chu.

Sorkar officer-te eiruk hi kan sawi ṭhin a, hengho zingah hian an ram neih zau dan, an car thar neih, an in sak leh an fate phaia thla tina cheng sing tam senga an thawn dante titi zak hauh lo an awm. Hei mai hi a ni lo, an sum hmuhna pawh hriat mumal loha hausa ta em em, tun hnua intilara mi hriat tura donation-te pe kuala MLA nih tum hialte pawh an awm nual a ni awm e, an zak lem lova.

Mi hi an zah si loh chuan zak tura lo ngaitute hi kan hah thlawn mai mai niin a chang chuan a lang. Zak tur emaw kan tih, an zahtheih lohzia kan sawi, midangte tlawn kuala dawtte sawia mahni insawi lian vak vak, intihlar ringawt atchilhte pawh hi an zak lo. An zah miah loh vang leh intihlar an atchilh avangin a lar pawh an lar thawkhat a, chumi an larna leh an pawisa neih chu (pawisa siam an thiam si) remchanga hmangin politics rim an nam ṭan a, MLA inthlan thlir chungin an phusa suau suau a, hetiang hi mi chi hrang hrang 10 dawn an awm niin an sawi.

A hre chiangte’n kan hmuhsit a, kan nuihzat ang hi a ni lova, a hre chiang lotu mipui tam zawk chuan an ngaisang a, an sum (a source thianghlim lem lo pawh telin) hmanga mipui lawm zawng an tih avangin ‘tak tak emaw ti’ mipui zingah an awm a, politics-a an zuan luh chuan an tling nawlh duh an tia lawm. Heng mite hi an zak lem lova.

- C Lalthianghlima