MIPUI BUHZEM

Zoram Peoples’ Movement (Ṭangrual Pawl) te chuan ‘Mipui buhzem’ an siam a, a duh apiangte tana pawisa thawh theihna turin Bank Account an hawng.

Ṭangrual Pawl hi Political Party an la ni lo a, ‘movement’ an ni tih hi kan hriat hmasak a tha awm e. Tunah rih chuan member fee pawh pek ngai loin a duh apiang tan he movement hi zawm theih a ni.

He pawlah hian ZNP leh MPC te an tel a ni. Mizo mipuite tan pawl hrang hrang - ZRF te ZDF leh ZEM leh MPP te nen pawl paruk hmanga he movement hi kal pui a ni.

ZPM ah hian mi hrang hrang an awmkhawm a, Koh­hrana rawngbawl­tute, Office a thawk leh pension tawh te, sumdawng leh zirlai thlengin an awm a, mi tin an leng a ni. Tuna an hruaitu ber (Steering Chairman) pawh Kohhran Upa, eng party-ah mah la tel ngai lo a ni.

Kan ram kalphung hi siamṭhat a ngai titu Pawl ding neuh neuh hi an lo awm tawh ṭhin a, rei an daih ngai lo. Nimahsela ram kalphung siamthat duhna chu mi thenkhat te thinlungah a reh tak tak chuang si lo a, harsa hle mahsela midang kuta dah leh ngawt loin ke an rawn pen chhuak ta a, tun hi an thleng ta a ni.

Mi pangngai tan chuan kan ram hi vei a ngai tawh a, a dam lo a ni. Mi chinchang hria te an mangang a, an theih ang anga siamṭhat hna thawk turin ke an rawn pen chhuak ta a ni.

Huai taka mipuite tana ke an pen avangin hmalam an pan zel a, tun hunah phei chuan khawpui chhung leh thingtlangah pawh member an neih belh zel a, hmun hrang hranga neutral mite auhna avangin an hruaitute pawh mahni in luma awm hman loin an zin zak zak a, an kalna apiangah thingpui sen hang nen an lo dawngsawng a, tlangnel takin an lo titi pui ṭhin a ni.

Nangniho hi kan beisei leh kan mi nghah te chu in ni an lo ti a, in kalphung chu sawi a ngai lo kan hre vek tawh an tih phei chuan thinlung a inhmu nghal em em ṭhin a ni.

He movement hlawhtlinna tur atan pawimawh em em chu ‘Mipui Buhzem’ hi a ni. Mi tinin a neitu kan chan ṭheuh theihna atan sum leh pai kan thawh theihna turin Ṭangrual Pawl chuan ‘Mipui Buhzem’ an buatsaih a, he movement hi lo hlawhtlingin sorkarna pawh lo chang thei ta ni sela neih ang anga sum leh pai lo thawh tawhtute chu a neitu kan ni vek dawn a ni.

A awmzia ber chu Party mal sorkar ni loin mipui sorkar dik tak a ni dawn tihna a ni. Hetah hian mitinte’n inthlahrung hauh loin kan remchan ang anga pawisa dah mai tur a ni a, tlem lua leh tam lua pawh a awm lo.

‘Mipui sorkar’ din a, ram kalphung siamṭhat i duh a, a neitu chan i chan theihna turin i remchan dan ang angin ‘Mipui buh­zem,’ A/c No. 97008723294 (IFSC - SBINORRMIGB) ah hian sum leh pai han thawh ve rawh le.

Mahmuaka Chhakchhuak