Mizoram Assembly Session 2018 thlirletna

Azawng aza thlir ve hman lo mah ila, in lam aṭanga kan lo hmuh chhun aṭanga rilru kaptu ṭhenkhat hmangin, kan ram rorelna sang ber kha i han thlir let lawk teh ang.

Chhanna chiang lo: Opposition party lam zawhna thenkhat chhang fuh thei lo, a nuihzatthlak zawnga chhang ta mai mai Minister hmuh tur an awm, kha khan ngilaihtuahna a va ti thui em, mahni department hriat chian lohzia tih lanna mai a ni. Department-a thunei ber nih ngawt hi duhtawk chi a ni lo, dik tak chuan mahni department hmasawnna tur ngaihtuah lem lo, sorkar officer-ten an khalh kual mai mai theih Minister hi an awm nual niin a hmuh theih.

Hei hi kan ram hmasawn lohna pakhat chu a ni ve khawp mai. Minister an rawn ni a, engtinnge kan department hian hma thar kan lak ang, kan lo tih dik tawh loh eng nge, ti a beng sika ngaihtuah chunga hma latu aiin, an officer-ten, "Ka pu, heti hian kan ti thin a" an tih chin chiaha kal mai thin Minister an tam thin em vang hian, hmasawnna tak tak awm lo hian term khat chu an nuai liam ve mai thin ni berin a lang. Minister thenkhat erawh chuan beng sikin an ngaihtuah tih hmuhtheihin, sum renchemna ngaihtuah avanga, department thenkhat ti bo ngam an awm. Khangte khan fak an phu a ni. Kan ram hian hmasawnna tur a la ngah lutuk, beng sika ngaihtuahna hmang thin hruaitu chak kan mamawh. Assembly House a chhanna dik pek theih loh avanga nuih ham hamna chi a ni tawh lo.

Kawng bawk kha: Kan ram kawng a chhiat hma thin em avangin, a siam dan a dik tawk lo a ni lo maw? tih zawhna pawh. A ni tak ang e, kan lo en chiang ang, tih ni lovin, department lam aṭanga chhanna lehkha them an rawn pek zeuh hmangin kan inchhang liam leh puat a.

Kawng ruh lutuk chu tlan a nuam lo, highway ah chuan an hmang ngai lo, tihte kha an sawi lang a, dawt chiang lutuk a ni. Kei pawhin ka hmuh ve phak, Pune leh Mumbai inkalpawhna Highway zau lutuk mai khu, RCC hmang veka siam a ni. Bihar CM Nitish Kumar phei chuan an Highway zawng zawng RCC chungah Alkatra a luan chhuak pur mai asin.

Kan sawi fo tawh, kan ramah hian lung chang tha a vang, concrete hmanga charh khawng loh chuan motor lianin a rah chuan rei loteah a khi nghal tuar zel, concrete hmanga siam that zia chu Bawngkawn leh Thuampui inkar kawng chanve lek, concrete-a siam saw, kum 10 chuang kan hmang tawh, tun thlengin a la tha reng.

A that rei chuan sum siamna a awm lovang tih kan hlau zawk emaw ni? Kum khat chhungin RCC in thui tak kan siam thei lo a nih pawhin, kum tin chhunzawm mai turin hma la ta ila, term khat chhunga kan zo lo a nih pawhin, kan siam chin chu tlo rawh se, hna tha kan thawh chuan, mipuiin min thlang tling leh mai ang.

Thlai thar hralhna mawlh mai hi: Assembly Session-ah khan thlai thar hralhna chungchang an sawi lan ka hmu lo. Thingtlang lamah Ramthar Campaign-in kan chuak thin a, kan inkawm honaa an sawi tam tak chu, "kan thawh chhuah ve chhun hlawkna khawp hralhna awm lo hi, thingtlangpa tan chuan kan Pathian ram ip pawh a puar ve thei lo a ni" tih hi a ni.

Kuminah hian Sawhthing 1Kg Rs 7/8 lekin an hralh mek, hmanah khan Hmei­thai Association khan hma an la tak tak a, 1kg ah Rs 80/- ten an leisak kha a ni a, Bangladesh lamah kawng an dap niin ka lo ral hriat ve. Engvanga chhunzawm ta lo nge ka hre lo.

Hmeithai Association pawh tluk lo Sorkar kan hrawn ngat ngat mai hi chu, thingtlangpa tan chuan rum ngal ngal mai awl tur tak a ni.

Thlai thar lei khawmna buatsaih vat a hun tawh, mimal emaw, society emaw hnenah loan hmangin, sorkar hian a thawk thei zawngin, hma la thuai se, vai thununna hnuaiah kan economy hi i awmtir tawh lo ang u.

Fakna lam: Assembly Session-ah khan, indeusawhna tawngkam te, mawi lo taka in ankhum te hmuh tur a awm lo, hei hi Mizote kan inchhuanna ve thin a ni reng a, hnam dang chuan in ankhumna hmun atan House hi an hmang ni berin a lang. Issue lian deuhah chuan han ân deuh piap piap pawh a awm tho. Tun ṭum session-ah khan ramri chungchang zawhnaah pawh, mipui sosân lai mah ni se, ân chiamin awmzia a nei lo a ni ang, cool deuhin a kal tlang ta mai a. Kan mize mawi House-a lo lang thin hi a hlu hle a ni.

Lalrinliana Colney