CHIEF SECRETARY?

Mizoram Chief Secretary atan hian hnam dang kan nei khat hle a. UT lai aṭang pawhin. State khat riang ruangah chuan vannei tak kan ni. State tam tak chuan an state milo chief Secretary tihte chu keini aiin an nei zing daih zawk.

Keini aia IAS ngawr ngawr ngah daih zawk si khan.

Lalkhama, Mi­chael Manzuala, F Pahnuna, Lalfakzuala, HV Lalringa, Hau­khum Hauzel, Van­hela Pachuau, L. Tochhawng, Lalmal­sawma. Heng ho kan CS an nih hun chhung hian keini aia State lian zawk, Mahni state a cadre nei hran thlap, an state mi IAS ngah daih zawk te hian an state mi nilo CS an nei fo zawk.

Lungmuana La­kher leh Laima Chozah te an pension tep tawh a, Pu Laima phei chu a pension hial tawh em ka chiang lo. Tuna hnam dang CS kan neih avang hian Mizo CS tur kan nei ta lo emaw ti hial kan awmin ka hre deuh. Lalnunmawia Chuaungo, JC Ram­thanga, Lalbiak­tluanga Khiangte, Robert Chawngthu, Lalrinliana Fanai, Christina Z. Chawng­thu, R. Lalvena, Franklin Laltinkhuma etc an la awm chho zel. Kum 20 hnuah pawh Mizo cs tur chu kan la nei.

Tunah pawh Lal­nunmawia Chuaungo hi CS ni thei reng tawh a ni a. Gujarat cadre a ni a. Deputation kal lamah engemaw buai­na te pawh a awm rih te pawh a ni anga. AGMUT Cadre chu ni se, Mizoram CS chu a ni der tawhin a rinawm.

Tin, Tun dinhmun­ah hian lo awm lo tak tak pawh lo ni se, ṭhangthar te han dem daih hi chu a mak ang reng. Keini thangtharte thiam loh niloin Kan nu leh pa, kan u te generation thiam loh a ni zawk ang chu. 1980-1990 inkara exam theite!

Engkim thang­tharte dem lo hian inkaihruaina tha zawk leh infuihna lem nuam zawkte pawh a awm ngei ang. A hrim hrimin tute thlahte nge kan nih a, nun dan ṭha zawk pawh chu tuten nge min zirtir anga, min kaihhruai tur ni reng reng le?

Thubelh: Tunhnai­ah a dik...Civil service Central lama tan kan lak angaih thu kan sawi nasa a, a dik reng. Mahse, Civil service lama kal tura infuih vek chi pawh a ni chuang lo.

An aptitude aṭanga kal tur chi an awm. India ram news agency liana thawk pha tur Journalist te, sipai officer te, India ram Institution hrang hranga inzarpharh tur academician te, leh Politician ṭha leh dik ni tur thleng pawha kan infuih a ngai zawk hrim hrim. Zai pawh India ram leh ram pawn deng chhuak pha law law turin... chutiang zel chuan...

Kan ram ṭhat lohzia te kan sawi a, ram siam ṭhatu tur Politician ni tura mahni fate fuih a, kaihhruai (groom) hi mi engzat nge awm ang le?

- F Vanlalrochana