HRIPUI DO HNEH AWL DAN TUR

Khawvel ram tinin kan buaipui Covid 19 hrik chuan Aizawl khawpui veng tin a luh chilh ta. Sawrkar tan pawh a hautak sawt ta hle. 

Chuvangin Lock­down chhung hian Aizawla chhung tinte hi hri kan kai leh kai loh khawl hmangin chhungkaw tin min endik vek se. Aizawl veng tina Local Council leh NGO, Kohhran tinten tha leh sum thawhin mahni veng chhung ṭheuhah test runpui nei vek ila. Test kit erawh chu sawrkarin min ngaihtuahsak zel se. Tichuan a vei leh vei lo kan hre chhuak thei ang a, inven dan leh inenkawl dan chu ruahman a awlsam tawh mai dawn a ni. Tun aṭang hian kan ṭan rual a ṭul ta. Mahni veng chhungah ṭheuh Kohhran leh NGO ten mahni rem hriat ang anga hma la thei tan sawrkarin kawng a hawn sak e, ti mai sela. Mahni veng chhungah sum thawh theiin kan thawh ang a. Tha leh motor thawh theiin thawh bawk ila. Health worker remchang apiangin tha thawh bawk se. Tichuan chhungkaw tin kan chhan him thei mai dawn a ni. 

Sawrkar hotute hian tlawm thlakah ngai lo se, Kohhran leh NGO, mimal chet chhuah ve theihna kawng hi hawng zau se. Rei lote chhungin Aizawl khawpui chhunga hri leng chu kan nuai bo thei mai dawn a ni. 

Lalpa chakna ringin.