ROMAN DAR

Hmasawnna hrang hrang avangin Aizawl khawpui hmelhmang hi danglam sawt tak a ni. Kum 50/60 liam taa in ding ṭhin te, hmunhma hrang hrang chu a bo pilril nual tawh a ni. Veng tam tak pawh la awm mah se an hming erawh a ral zo a, hming thar an pu tawh hlawm.

Khang thil hlui leh hlu tak takte kha eng emaw zat chu a humhalhtu pawl ṭhahnem ngai tak, Indian National Trust for Art and Cultural Heritage (INTACH) Mizoram Chapter kan neih takte hian an humhalh ta tlat hlawm a. A lawmawm takzet a ni. INTACH pawlte hi pa rawn tling, tawn hriat ngah, val upa rual awm khawm an ni deuh ber a. An hmalakna hi a chhuanawmin ṭhangthar fing leh fel tak takte hian ṭawiawmin an hnung zuina chang hre leh zual se thil duhawm tak a ni.

Aizawl khawpui chhunga hmunhma hlui leh hlu tak tak an humhalh zingah hian Roman Dar kan tih mai ṭhin hi an la telh lo a nih chuan telh ve dan awm se a lawmawm hle in a rinawm.

Roman Dar an tih mai ṭhin, tunah chuan Christ the King Cathedral Dar a ni tawh ang chu. Aizawl ti Aizawltu ber pakhat, Aizawl signature zinga chhiar tel tlak he dar hi Katholik puithiam Holy Cross Father George Breen, Canada mi chuan Biakin dar atan tiin 1945 khan Silchar lam aṭanga a rawn phurh thlen a ni a. Thir charna wielding atana an hman Carbide Gas cylinder, dar bur ruak lian leh sei tak, a san zawng 4.56 ft, hawlhtlang (diameter) 9 inches a ni. Kha tih lai khan Tlangnuam kawng hi motor kal theihin a la tlang lo a ni maithei, an eisiam leh an tirhkah ṭhin tlangval chak tak, Runa chuan hnama phurin harsa takin Biakin a thlen thei hram a. A phur chho lai mit ngeia hmutu hian vanneihthlak takin min la dampui, amah chu tudang ni lovin Katholik thurin Mizorama rawn pu luttu Pu Thangphunga fapa ngei mai Pu G Thanmawia (88), Samtlang hi a ni. Hemi kum aṭang hian Biakin inkhawm dar bakah zing,chhun, tlaiah te vuak ṭhin niin Katholik kohhran mitthi dar a ni nghal bawk.

Hman a nih aṭang hian Katholik puithiamte duh dan anga awmze nei taka vuak ṭhin a ni a. Zing dar 6, chhun dar 12 leh tlai dar 6 bakah inkhawm dar vawikhatnaah te chuan Pa leh Fapa leh Thlarau Thianghlim (Trinity) chawiin vawithum, ri zing deuhin ṭum thum, vawi kua vuak phawt a ni a. Chutah vuak hnih zela kalin vawi sawmnga pasarih thleng vuak hnuah a tawpah chuan Trinity bawkin khat raihin vawi thum khawn leh a ni a. A vaiin vawi sawmruk chiah vuak rik ṭhin.

Nimahsela vanduaithlak takin December 5, 2019 khan he dar vaw ṭhintu leh Biakin enkawltu Kerala lam mi, Lawrence-a chu a thi hlauh mai a. A thih hnu hian midangin dar vuak an chhunzawm a, vuak dan tur kaihhruaina an hre chiang ve lo nge, thla hnih thla thum zet chu an duh dan angin an vaw ta deuh mai mai a. An khawn nat zawng pawh chik taka lo ngaithlatu tan chuan a mumal lo deuh niin a hriat.

He dar ri uluk taka lo ngaithla ṭhintu mi ṭhenkhat chuan Katholik Koh­hrana rawngbawltu ṭangkai tak hnen­ah ṭawngkaa hrilhin a hnuah erawh chuan a vuak dan tur dik taka vuak chhunzawm leh a ni ta nghe nghe.

Han ti ve khanglang ila, kan naupan­lai 1956 a Kulikawn Primary School-a A pawl kan zir ṭan aṭanga vawiin thleng hian he dar hi sana lian, ṭangkai taka hunbi min hrilhtu a la ni ta fan mai. Zing dar 6 vuak rik kan hriat chuan zing thawh a hun ngei ngei ta tih min hrilh a. Tlai lamah dar 6 vuak riin homework tih hun leh lehkha zir a hun ta tih min hrilh ṭhin. Aizawl khaw chhung hmun hrang hranga kan tualchaina ṭhin High School field a kan inkhelh lai te, Bawrhsap tuikhuaha tui kan chen lai te emaw luipui dung vela sava veh, thang kama kan kalna aṭang pawhin chhun dar 12 vuak ri kan hriat chuan chhun thingpui in leh chaw chhun ei a hun tih hria in mahni in lam min pan tir vang vang ṭhintu chu he Roman Dar hi a ni.

He dar ri hian Aizawl khawpui pum hi a fan chhuak ṭhin. Amaherawhchu, hmasawnna hrang hrang in lian, hrawl leh sang pui pui lo din tak avang te, lirthei leh khawl ri hrang hrangte avangin tunah chuan a ri hre pha an tlem sawt ta hlein a lang. Chuti chungin tun thlenga a ri la hre pha tan chuan dar ṭangkai leh ngaihnawm tak a la tling.

Dar ri dawngsawng pha hi tun hma ai chuan tlem hle tawh mahse ṭhahnem ngaih leh thil hlui vawn ṭhat duhna thinlung aṭangin he thu hi han tarlang a ni e.

- Zothankunga