OSD AN TI LEH TA MAW?

Kan pu berin OSD a ruat thar leh chuan sawi a hlawh hle mai, kan han sawi ve leh hram ang e.

OSD hi hna pangngaia dah remchang si lo, tute emaw duhsak zawng, mawi leh mawi lo pawh thlu lova dah luih hram an duh vang leh tu emaw dan anga hna a thawh ṭhat, an rilrem zawng ni si lo, tute emaw ṭawngkam takah dahṭhat an duh vanga chutiang mite tana pawisak nei miah lova hna an 'siamchawp' a ni.

Hmanni lawka Pu Ruata Sailo-an OSD tir dan kha a hnuhnung zawk khi a ni a. Tuna mi hi a hmasa zawk ang khi a ni ngei ang. A kalphungah chuan Adviser hna nen hian a inang viau a. A danglamna erawh chu Adviser hna hi lawmman inpekna a ni a; inhrem nana hman erawh a ni ve ngai lo hi a ni.

Dan hremi rual Law Department-a kan neih laia dan hremi a hranpaa Adviser neih chhan chu induhsakna bak chhan dang hriat theih a ni lo. High Court Judge ni thei khawpa Law Secretary fel leh thiam kan neih lai phei hi chuan a awm lo lutuk a ni.

Kan ram zau zawng ngaihtuah chuan Engineer nei tam 'ber' kan ni a. Chu a chhapa 'top heavy' an nih lehnghal laia Engineer Adviser han neih leh tlat mai chhan chu eng nge ni ang? Hotupa berina sahuai thing vawn ang hrima a vawn tlat PWD hi hna thawk ṭha lo ber a ni a. Assembly House meuh pawha kawng chhiat chhan 5/6 a sawi te lah awihawm a awm si lo va. Chung hun leh tun hun pawha ṭha chuang si lo, a ṭhat zawk nana ‘advise’ pe tura, a department-a a khaipa ber ni ṭhin han neih leh chuan eng beseina nge a neihtir ang? 'Vangvat Kailai Nite' kha a lo lang leh ta uai uai zawk em ni ang?

Nge, hnampa an tih ber pawhina a ni hi sapṭawng thiam bera ngaih ni-a a fate zirtirtu atana a thlan ngat vanga amah thlaktu lo ni thei ta thisenah hian duhsakna hi a bet nghet tawh em a, a thiltihtheihna te chu heti zawng hian a hmang ta zel mai zawk?

Hetiang tih hi, “Power corrupts, absolute power corrupts Absolutely” an tih zulzui a, Misuse of Power satliah pawh ni lo, 'abuse of power' an tih hi a ni e.

State pachhe ber, chawm­hlawm titiha awm, corruption kai­rualna ber, natna ṭihbaiawm pui puiina a bawm nasat ber kan nih reng laia hetiang dinhmuna kan dinna-a a mawhphurtu ber, hma kan sawn nana tih tak takna neih tum chuang miah si lo, zah nachang pawh hre miah lo, Function ṭenghneng tệ tệ-a Khuallian tih angrenga inlar zur zut mai’, an tih tur dik tak ti lova, an tih loh tur ti fo mai an nihzia an han lantir nawn leh a ni ber e.

Kan ramin insiamṭhat kan mamawhzia a rawn lan­chianna a ni. Anni hi siamṭha thei an ni lo va, tichhe zel zawk tur an ni tih an lanchiantir a. Siam­­ṭhat hna chu mipui, 'Zoram Khawvel' nghâktu­te kutah a awm tih min hriat chiantirtu a nihn a hi kan Zirlai bu-a Bung pawimawh ber a ni tih i hria ang u.

- Michael Lalmanzuala