Zofate hnena thuchah

Kan ram leh hnam a dinchhuah kumkhua theih nana ka ngaihtuahna leh theihna zawng zawng ka hman hnuin, kum hmasa aṭang khan, vauna deng­khawng tak ka tawn fo avangin, “Ka hai,” tih thu chanchinbuah te pawh ka lo chhuah tawh a. Chu ka haina chu, nihna chelh thu-ah leh UNO lama kan zawlte nena inpawhtawnna lamah pawh a ni ber a. Mahsela hai theih lohna chin erawh a awm avangin, ‘Thliarkar Dang Ngaihdan Dek Che Tham,’ tih lehkhabu pawh February thla mai khan kan chhuah leh ta a. He lehkhabu hi, History zirtu nihna zawna ziak a ni. History chuan,

ṭanlam neih pawh a tum lova, sawi hreh pawh a nei ngai bawk nahek lo.

Tunah hian kan ram dinhmun hi a chhe lailet der tawh a, siam ṭhat leh theihna hun ṭha kan nei a, chu chu UNO lamah a ni. Chu chu hriain, Pu R.Thangmawia kaihhruaina hnuaiah theihtawp tak meuh meuh chhuahin, tling leh tling lovin kan bei a. Chu chuan awmze ril tak a nei hman tawh a. Tling lo hlawm teh mah ila, kan thawhrimna chuan rah ṭha chhuah tumin, Zofate chi hrang hrangte pawh fawkkhawmin, Political Party hrang hrangte intiamkamna pawh kan la vek a, a bik takin Mizoram state chhungah a ni.

Chungte avang chuan, hlim leh thatho takin, UNO Kum Sawm bi (First Decade) chu kumin hian a lo ral dawn ta mek a, September 2018 hian a kum 10-na chu a kin dawn a ni. Chumi hun chhung chuan khawvela Tualto Hnamte chuan, theihtawp tak meuh meuh chhuahin, an bei mek a. February leh March thla khan, UN Human Rights Council Geneva-ah kan thiamthu, ziakin kan thehlut a. Chu pawh chu kum khat kan tlai tawh hnuin a ni nghe nghe. Tin, March ni 17, 2018 ral hma khan, hun

ṭha, UN High Commissioner, Geneva pawhin a hawng leh a. Tunah hian April ni 16-27, 2018 chhungin New York-ah kan dikna chanvo sawi leh theihna huang a awm leh dawn mek a.

Nikum April-May thla khan kan hun tha hmasa chu, a hmuih ral der tawh nghe nghe a. Tun tum, April thla pawh hian, tan lak leh nachang kan hre tawk lo leh dawnin a lang a. Hmanah khan, “A va pawi em!” kan ti a. Tunah hian, “A va pawi em!” kan ti leh ta mek a. Nakinah zet chuan, “A va pawi ngai tak em...!”

ṭhangtharte’n an ti leh ngei dawnin a lang ta.

Kumin July leh Sep­tember thlaa UNO thlaphena sawihona tur huanga kan tel ve theih nan, tun April thla hi a pawimawh leh em em a. Chuvang tak chuan a ni, “Kumin MLA Inthlanpui hi chu kawmserh rih a, kumin chhung hi chuan, “YMA ṭawngkam takin, Zofate Inkhaichhuah theih nana Kumpuanah i hmang ang u,” kan ti a nih hi.

Kan rualhluite’n Politik humsual, Tualchhung Poli­tik, Bazar Politik min daipui tawh ṭhin a. Khang zawng zawng kha, inchirh­theh nana hmang tawh lova, theihnghilh hmiahin, kumin hun ṭha hi chu hmang thiam turin, Zofate zawng zawng kan inchah thar leh a nih hi.

Mi tin, chhungkaw tin sum lakluh dan enin, “India ramah kan chhe love,” tih te hi zawng a la lut tamte hian, la lut tlemte min kaih kep avang lek a ni tih kan hria em? Tunah hian, retheite retheihna lamtluang hi a zau tial tial dawn a, chhungkaw laihawl leh hausate erawh a let li, let ngain a pung tual tual dawn.

- Keihawla Sailo