RUKRU FING

He thu hi ziah ka inring ngai lova mah se midang tan ṭangkai a nih beiseiin zak tak chungin ka ziak ta a nih hi. Ni 15 September 2021 a thil thleng a ni.

Nui uar uar chunga infiam paha inbum hi chu a hrehawm em em lo. Chutiang ni lo, a nuihzatthlak lo chi leh channa thlen thei chi a inbum chu a dan a dang tlat. Ka ṭawngṭaina min chhansaktu vangin ka awmdan kha thil ṭangkaiah a inlet thei hlauh dawn a, ka lawm ta riau thung a. Hetiang hian thil a thleng:

Internet hman theihna phone emaw computer kaltlanga pawisa inlaksakna a ni a. Mit khap fuk fuk leh ṭawng zut zut chungin kan inrawktir a ni ber. Hetiang lamah hian misual rukru fing vervek ho hi an huangtuau tawh em avangin anmahni chhui tur Cyber Crime Branch hial pawh kan lo nei ve ta reng mai. Kan tawn ang tawng hi Aizawl Police Cyber Crime lam pawhin an lo hmelhriat tawh tih ka hriat avangin chhanhim theih a mual mual an awm ka beisei vang chauhin ka lo ziak a ni.

Kan phone changkang tak leh Internet hmang hian eng hunah pawh, engtik lai pawhin kan awmhmun aṭangin kan bazar thei ta a. Chutiang a bazarna pakhat chu NYKAA a ni a, a tlangpuiin he bazar hi hmeichhe lawmzawng, hmai leh tin cheina chi, vun enkawlna chi leh chutiang kaihhnawih zawrhna a ni. Keimah tak chuan he bazar hi ka tlawh ngai lo va, ka naute erawh chuan bungrua an chah zeuh zeuh avangin an address leh phone namber te pawh chu bazar chuan a chhinchhiah thlap tawh a ni.

Internet awm a chin chu namber hriat lohvin min lo phone te, kan thil chah ni lo kan address in chhu thlapa thil a lo thlen te hian mak pawh kan ti meuh tawh lo a ni.

1) Min bumtute chuan ‘NYKAA’ hming hawhin ‘nyka’ tiin whatsapp-ah min lo bia a, a sipel dik leh dik loh hi inbumna hriatchhuahna awlsam ber a ni fo ṭhin. Tun hma kha chuan website address dik lo hi hriatna awlsam a ni ṭhin a, min bumtute erawh chuan website dik min pe thlap thung a. Pawisa kan thawn fel vek hma chu phone dah lovin kan inbe char char a, finfiah hman lovin min siam nge ni, nachang kan hre lo zawk. A dik tih ka hmuh khan ka duh tawk deuh tlat a ni.

2) An tawktarh, kan tlansan phal loh, kan inawhna chu NYKAA BIGGEST Promotion Day an hmang a, Rs. 4999/- man chin ka dawr chuan 40% pawisa min pe let dawn a, chubakah chuan dawrtu mi 5 LUCKY COSTUMER te chuan thilpek duh thlan tur, Smart TV 49 inch, Dell inspiron Laptop, Apple iphone 11, Voltas AC leh LG Double Door Refrigerator an chhawpchhuak a ni. Ni khat chhung chauh a nih avangin hun ngah lo ang takin kan inhre deuh tawp mai a ni.

3) Phone a min biain anmahni dawrtu mi vannei mi 5 zinga pakhat ka nih thu min hrilh a, lawmman thlang turin min ti a. Tichuan, an lo thawnna tur kan awmna NYKAA app a kan ziahsa ring chuan an finfiah a. Phur takin min siam a.

4) NYKAA Apps a lut a Rs. 4999/- man aia tlem lo hu thil ka lei tur chu thlang turin min tia. Mahse, ni danga NYKAA apps a pawisa pek erawh a rem loh dan min hrilhfiah a. NYKAA Apps a pawisa kan pek chuan 40% pawisa min pek let tur kha an office bikin BIGGEST PROMOTION DAY an hman leh NYKAA apps a leina chu direct a bungrua siamtute hnena a kal ṭhin thu min hrilh a. Chutiang a nih avang chuan debit emaw credit card hman a rem lo a, Online banking hman a ngai tiin kan pawimawh engmah min dil lovin an bank account-ah chuan mumal takin pawisa min thuntir a. An Bank account namber chu ka ziak thla lo a, an IFSC te erawh chu bungrua kan lei tur kan thlan leh pawisa kan thawnna te hi a thla lain whatsapp ah anmahni thawn nghal turin min ti a, in be reng chungin kan thawn nghal zel a.

5) Mi vannei kan nih avanga min lawmpui thute min hrilh a. Pawisa an dawng ngei tih an finfiah hnu darkar 1:30 vel hnuah min biak zawm leh tur thu leh harsatna a awm chuan min biak mekna namber a be leh nghal turin min ti a. Tin, whatsapp-ah bungrua kan chahna Order ID leh thil ṭul dang ni awma lang min thawn a. Chung chu min biak leh hunah a pawimawh tur thu min hrilh a, ngaihṭha taka min siamin min thlah a ni.

6) An sawi hun awmah chuan min thlamuan nan pawisa kan thawn zat te, 40% kan hmuh let tur zat leh 'Mi VANNEI' kan nih lawmpuina min hlan leh a. Pawisa inthawnna chungchanga lehkha tihfel ngai tihfel a nih veleh kan bungrua thlan (Rs. 4999/-) te kan tih chhunzawm dan tur leh bungrua an lo thawn dan tur min hrilh turin min thlah leh a.

7) Darkar chanve pelh hnuah bungrua thawntu lam a thawk ni awma insawiin min lo be leh a. Chu chuan kan VANNEI LAWMMAN iphone man Rs. 1,99,000/- chu min peksak a, mah se Mizorama luh nan a chhiah chawi tur Rs. 9844/- chu kan pek a ngaih thu a sawi a. Pek tur ka neih loh thu ka hrilh chuan kan Rs 4999/- man hu bungrua ka thlan leh VANNEI Lawmman ka dawn tur zawng zawng chu a tawp thu leh pawisa ka chawi tur chu darkar 24 chhunga an tihfel tur thu min hrilh a. Zan dar 6:30 rik hma deuhvin min bumna kalkawng chu a hmawr an bawk fel ta a ni.

Darkar 1:30 vel hun kan neih chhung khan ngaihṭhat lohna awm zawng zawng theihnghilhin hna kan thawhsan leh a. Kan harh chhuaha internet a hnu kan chhui chuan min bumtu an nihna awm ang thu chu a lang a, mahse an bum dan tak inziak kan hmu fuh mai lo a. Min lo biak leh pawhin kan chhuahchhal uk a, an insawifiah nasa khawp a.

- A lem chu ni ila ORDER ID kan lo thawn lo ang che

- Pawisa min thawnna pawh thla kan laktir che a in duh chuan min chhui thei ang (Hetiang aṭangin a inchhui theih leh theih loh kan hre lo)

- Min rinhlelh chuan kan cancel ang a, pawisa pawh ni hnih ni thum chungin kan lo thawn kir leh ang tih te hi a langsar a ni. Kan record na a, vawiin lamah an phone a nun tak loh avangin awmzia a nei thui pawhin a rinawm lo. An kalphung a fel fai a, an tumah an chiang viau. An phone hi nung se chuan ka la nghak ang, mahse ni hnih chhungin an bum ṭeuh che u ka hlau a ni.

Kan tihsual anga hlawk thut emaw, awlsam taka thil ṭha dawn leh hmuh tum avanga chesual in awm loh ka duh a ni. Awlsam taka hlawkna dawn chi reng reng um lo turin mahni inthunun thar ṭheuh ang u.

Rimenhawih Msi, Upper Republic