Kum 2023 hi ka huphurh

Mi ṭhenkhat chuan kum 2023 hi MLA inthlan kum a nih vangin a Krismas au pawhin an nghakhlel tawh ang a, kei chu huphurh tâk te hian ka huphurh thung a ni.

He kum hian Mizo­ramah rorelna a thlak hlawk thei a, chumi lai karah chuan roreltu ngai bawk pawh kan thlang nawn leh a ni thei - a huphurhawm lai tak zawka chu inthlan hma boruak leh thu inchuh kara mipui hawi hai tur lam zawk daih hi a ni.

Tunah hian thil ho te te ah pawh kan hotute an inhnial zel mai. Lungleia RTPCR khawl bun duh loh chungchangah pawh kan politician te nawrna vang tih hriat reng rengin kan Health Department Officials lam chuan Health Department hriatpuina thlapa RIPANS leh MZU lama kan mithiam säng ber berte laboratory endik tura kal chu mithiam angin an pawm zui duh lo tawh hial a ni.

Aibawk khúa in khel­mual an neih ve tur chu an siam muan em avangin Oppo­sition MLA chuan tlawhin thil awm dan chiang taka hailan a ni dek dek a, Minister leh Bialtu MLA in an tlawh ve leh a. A hmaa mite nen an thusawi a inkalh ta nghal a, mipuiin awih tur zawk kan hre lo reng reng.

MLA aṭanga Pu Lalduhoma an bân dawna an hek khan dan bawhchhiatna a neih nasatzia kha an sawi tak tak kha chuan dan bawhchhe pa dik tak a ni a, nimahsela Pu Lalduhoma ang chiaha thlan tlin amah ang chiaha ZPM MLA dangte chu an hek ve leh chuang lova; Sangha an bomb ngei tih chiang taka hriat pawisa pawh chawi hial MLA chu hrem a ni leh ta bawk si lova. Khawi hi nge dika dik lo hi mipui nawlpui hi chuan kan hrethiam ve tawh lo.

Mizoramin khaw­vel hmun dangte angin Covid-19 hri pui a buai pui hah vanglai, hripui hlauh avanga patling pawh mahni in chhunga kan khurh ruk der der lai takin hmanhmawh takin Health Deptt pawisa chu audit a ni thut mai a.

Sorkar Department dang pawh audit chhoh tur tih a nih laiin Sorkar Depart­ment dang an audit leh chuang bawk sii lo. Heng thil in ṭhial hi han ngaihtuah ila kum 2023 inthlan dawnah hian politician-ten thu hrang hrang an han sawi ang a, party hrang hrang hian an duh lova an in sawi sum an che lek tel bawk ang a, chumi kara mipui dinhmun chu a huphurhawm dâwn a ni.

Mahni tlukpuite hlawh phak loh avanga sorkar hnathawk an nawr laiin Rs 1 hlawha Secretary tlukpuia thawk duh tur kan nei a. Covid-19 dona atan hlawh chanve thawh kan ngaihsan ang kha chu kan OSD thar tán hi chuan tih ve chi a ni lovang.

Ram hmasawn kawnga a thawh hlawk chhoh chuan tuna an sawisel hian fak a hlawh ve leh daih thei a, mahsela kan OSD thar hian thawk ṭha mahse Opposition chuan 2023 ah chuan an sawisel leh dâwn tho avangin a hnathawh dan hi mipui chuan a dik ber kan hre leh lek lovang.

Inthlan hi political party mi leh sâ ni lo tán chuan thil ninawm ve tak a ni a, a tute pawh tling se India rama RTPCR Laboratory nei tlem ber state enkawltu tur mai an nih avangin hmasawn thut hi chu a harsat a rinawm.

- K. Mazualtea