Pawl pathumna tur hi?
Tunlai Mizoram politics titi ber mai chu MLA inthlan lo awm tur hi a ni a, mipui nawlpuiin kan la buaipui hma hian a chhunga cheng tawh politics lam ngaihventute chuan inthlan hi kar leh maia thleng tur angin an ngai a, mawng vawm ba ang sekin an bei ṭan tawh a ni awm e.
Tichuan Mizoram politics chu ṭhuang hnih lian takin a kal sa ruak mai a, hei hi chu kan ṭan loh lam party pawh ni eng ang mahse kan hnial thei lova, Congress leh MNF hi party lian fal pahnih chu an ni. A pathumna nih tum hian party awm sa ZNP leh MPC-te bakah ram siam ṭhat duh nia inchhaltu tu emaw an inzawm khawm a, anni hian ‘Ṭangrual pawl’ intiin ZPM an invuah. Hei bakah hian India rama roreltu ni chunga Mizorama thawm nei hleithei lo BJP an awm. Hei mai bakah hian NGO anga corruption do ṭhin tun hnua a roreltu nih tum PRISM an awm ve bawk a, hei hi chu pawl han tih hnam vak an ni lo.
Tunah hian inthlang thut ila, May-a inthlan ni ta se Congress tho hi an tlin hmel hle a, anni hian MLA 34 an neih zinga 10 vel hi chu ‘bial him’ an ti thei ang a, hei hi chu politics-a ṭan lam nei tan pawh pawm ve mai chi a ni. MNF hian tunah hian ‘bial him’ tih tak chu bial pakhat bak an neih hmel lova, a bak zawng hi chuan ‘bial him’ hi an la nei lo. Hetihlai hian Congress hi an tling dawn tihna a la ni lo, May-ah inthlang thut ila, midang insiam rem leh inpeuh hma chuan thil a thleng thei tih vel mai mai a ni hei hi chu.
Tuna politics-a titi ri ret ret chu ‘BJP an phi ruai’ tih hi a ni a, vaibelchhe tam tak hûm run chungin khawiah nge an vawm dawn an ngaihtuah mek. MNF-ah vawm an duh a, a zawm pawh an inzawm ru deuh tawh a, amaherawhchu anni pahnih hi thil inhmu chiang lo a awm a, an buai ru. ZPM lam hi chuan an pawl ang hi chuan BJP an do thu leh duh loh thu an sawi tawh a, ZPM-a tel mi lawk deuh
ṭhenkhat hi chuan BJP sum hi an hmu tai hle a ni awm e.
PRISM hian an mal din tur thu an sawi a, anni hi mi tlem te mah ni se an ruh a, politics khelh tum hian plan thui tak an nei a, tun hnaiah mi hausa pakhat nen an inbe ṭha mek an ti a, hei hi MLA inthlan dawnah meuh chuan PRISM tan plus aiin minus a nih theihna chhan chu PRISM hi ‘corruption do’ tih hmanga mipui hip tuimtu kha an ni bawk si.
Pawl pathumna chak tak a awm loh chuan Congress leh MNF bawk inbei lehin pawisa ngah zawk Congress chance hi a ṭha leh thei tlat a, tunah hian Mizoram hian a party pathumna tur hi a zawng ruai ruai a, a la zawng hmu lo. “Kan kal dan ngai hi ṭha kan ti,” tia ṭha ti lo chunga ngaiawh tuma hnungtawlh hmabak state pawh kan ni lo ang tih a sawi theih loh.
- Lalchungnunga