Quality education Nei tur chuan library changtlung tak neih a ngai

Quality Education nei tûr chuan Library changtlung tak neih a ngai. Tunge finna mamawh? tiin inzâwt ta ila, mamawh lo rêng kan awm lo vang. Kan hma zâwna tih tûr (task)-ah ṭheuh hian finna hi kan mamawh vek mai a ni.

Khawvêl changkâng zêl­ah Agriculture Society aṭangin Industrial Society-ah kan chuang chho va, 21st century kan thlen meuh chuan Information Society-ah inhlang kai in, kan intlânsiak ta mup mup mai a ni. Thiamna leh finnain rei lo têah mihring chakna a tuk zal a, sek deuh leh in-fit tak, black belt sâwm chuang nei pawh pistol-a vawikhat kah tuar chhuak zo an awm ta meuh lo. A ruh no no chhuakah kan tih pawh hi a mâwl mâwl chhuakah ti ta zâwk ila a inhmeh ta zâwk hial âwm e. Chutiang khawvêla awm kan nih tawh avâng chuan tûnhmâ kan tih dân/ chîn dân thin tih fo hian ram ropui min thlen dâwn lo va, thil tha leh fing zâwk hi kan chîn thar zêl a ngai ta a ni.

Ziak leh chhiar lama Zofâte hmâ nasa taka min lo sialsaktu, A AW B min zirtîrtu kan missionary hmasa Sâp Upa leh Pu Buanga-te chungah lâwmthu sawi hi kan ba nawn awn awn a ni. Anni vâng liau liau khân zofâ ten mahni ṭawng ngeiin ziak leh chhiar kan lo thiam ve ta a, ziakmi leh zirmite pawhin lehkhabu a rema rem tham, a chhiara chhiar zawh rual loh kan lo nei ve ta reng mai. A ṭangkaizia leh pawimawhzia pawh mitinin kan hre vek âwm e. Khawvêl hmasâwn zêlah rual el pha tûr leh an neih ang nei ve tûr chuan heng an thil min hnuchhiahte hi tihhmasâwn leh vawn nun zêla tihhausak deuh deuh hi ṭhangthar zêlte tihmâkmawh a ni. Thiamna leh finna min petu, a hnâr kaitu ber chu lehkhabu hi ti ila kan tisual tam âwm lo ve.

Lehkhabu han tih hian chi hrang hrang a huam thei a (Paper print, Document, E-resources etc.), kan lâk khâwm­na leh kan dah khâwm­na hmun chu Library kan tih mai hi a lo ni ta a ni. Library-ah chuan collection hrang hrangte vawm khâwmin awmze nei taka remkhâwm leh vawnṭhat a ni ṭhin.

Lehkhabute hi kan vawn ṭhata kan enkawl ṭhat loh chuan ral mai thei (expired) leh chhe (damage) awlsam tak an ni a. Chumi enkawl tûr chuan (Library Professional) mithiam bîkten uluk taka zir chiang a, awmze nei taka enkawl a ngai.

Library hi chi hrang hranga ṭhen theih a ni: vântlângina an hman tûr Public Library (YMA, District, leh State Library etc.) te, Academic Library (College, University) zirlaiina an hman tûrte leh Special Library, a bîk taka siam, entîrn nan (Research Library) ang ten an ṭhen a. Mamawhna ang zâwn zêlah document lehkhabu an lakhâwm ṭhin a ni. India ramah chuan National Library, Kolkata hi kan neih len ber a ni a, lehkhabu nuai 22 chuang a awm a ni. Mizoram bîkah pawh Library bîkah zawi zawiin hmasâwnna a thang ve zêl a, Library Professional zir chhuak an pun zêl avângin library (management) enkawl dânah pawh state dangte mai bâkah khawvêl zau zâwkte tih dân nên danglamna awm êm êm lovin kan kalpui thei tan tawh a ni. AICS Library ngei pawh kum naupangte mah nise collection sing hnih chuang a lo awm ve dêr tawh a ni a, college dang leh institution dangah pawh helamah hian nasa takin harh tharna a thleng mêk zêl a ni.

Library enkawl hi hna awlsam lo tak mai a ni. Collection tlêm zâwkahte chuan professional kher lo pawhin eng emaw chen a kalpui thei a. Amaherawhchu, collection sing a pelh chin tawhah chuan awmze nei taka kalpui a ngai a, chinchâng hre miah lo tân phei chuan hun tam tak paihna a ni a, lehkhabu pakhat lek hai chhuak tûr pawhin kan inzawng nilêng ṭhak thei a ni. Zirna sâng zâwk kan thlîr chuan NAAC hovina point an pêk pawimawhzia kan hre vek âwm e. College dinhmun zira a ṭhat dân enfiaha tehtu an ni a, chuta grade sâng hmu tûr chuan Library kan hlamchhiah (neglect) thei lo a ni. Mi thiamten “Library is the heart of Institution” an lo tih hial kha a ni a, thil pawimawh leh chhenfâkâwm hi chu mi thiamte bawk hian ngaih pawimawhna châng an hria.

Library changtlung kan tihin a a huam tlangpuite chu:

1. Collection : Hei hi Leh­khabu chi hrang hrang neih zât kan tithei ang. Sap

ṭawngah chuan documents tih a ni a, a chhan chu print-te non-print-te leh thil dangte a huam vâng a ni.

2. Furniture: Hmanrua chi hrang hrang lehkhabu chhiarna tûr dawhkân, ṭhut­thleng, computer, internet-te leh reading environment ṭhate a huam thei ang.

3. Opening hour: Library timing hi a pawimawh hle a, a hmangtu (user) ten a ṭangkai thei ang ber leh an hun neih tam thei ang bera an chhawr theih tûra hawn theih hi a ni. Zirna ṭhenkhat IIT (Indian Institute of Technology) tam takah phei chuan staff an indaih bawk a, exam lai phei chuan 24/7 hawn chângte pawh an nei hial ṭhîn.

4. Staff service: Staff-te hi an pawimawh a, Library hmangtute pui thei tûra an inrâlrin renga thiamna an neih a ngai bawk. AICS Library-ah pawh hian Reference Librarian zirlaite leh zirtirtute mamawh zawnpuia an material mamawh phuhrûk tûrin Library staff pakhat dah a ni nghe nghe.

Aw le, kan sawi vek sêng dâwn lo va, kan sawi tâk aṭang pawh hian kan hre nual tawh âwm e. A pawimawh ta ber chu keimahni ṭheuh hi kan ni. Library changtlung leh

ṭha tak nei mah ila, a hmangtu tûr kan awm chuan loh chuan awmzia a awm dâwn hauh lo a ni. Zoram mipuite, a tê ber aṭanga a lian ber thlengin quality education nei tûrin kan hmuh phâk lehkhabute chhiar a, kan mamawhna zâwn ṭheuha seng luh leh chhawr ṭangkai tûrin kan insâwm tak meuh a ni.

- F. Chanchinmawia, Asst. Librarian Academy of Integrated Christian Studies (Shekina Hill) Tanhril, Aizawl