Publicity âtchilh hi
Tun hmaa kan hriat ve dan chuan Vai politician zingah chuan a lar apiang hi an tling ṭhin a, Vai lehkhathiam lo leh mi hnuhnung te te ho chuan Vai film star an nih tawh phawt chuan an vote tling zel an ti a, tling tur chuan lar hrim hrim a pawimawh hmasa tiin Vairamah chuan an sawi ṭhin.
Hetiang hi hria niawm takin tun hnaiah Mizoramah politician zingah publicity atchilh an awm ṭhin a, politician nih tum zingah pawh publicity atchilh hi an awm a, chutiang mi ni lem lo publicity atchilh hrim hri hi an awm ve bawk. Tun hma kha chuan social media a awm loh avangin chanchinbu lamin an chhuah duh loh chin kha chu mipuiin kan hre lova, tunah chuan social media hmangin lem a chan theih tawh a ni.
Minister pakhat chuan amah zuitu, a vah velna zawng zawng ziaka dah ṭhin, a ṭul phei chuan a thlalakte social media lama thehdarh chuai chuai tur a hruai ṭhin e, an ti a, tak tak a nih chuan a nuihzatthlak hle a ni. Chutiang bawkin AMC Councillor thlengin mahni chet velna Whatsapp, Facebook vela thehdarh ching an awm an ti a, midang thehdarh ni ta zawk se a pawm a nuam deuh tur a ni. Eptu ṭhalai pawl pakhat pawh hi naupang zawk leh lut thar zawk mi ṭhenkhatte chu publicity-ah an chak fâl em em a, an lanna thlak nen an thehdarh chak avangin chutiang ti ve thiam lo party-a senior zawkte an lawm vak lova, a tharin an lar khalh dawn avangin an lungawi lem lo, tihte pawh titi a awm nia.
Heng zawng zawng aia nuihzatthlak leh chu politician tia va sawi tur la ni chiah lo, MLA inthlana din tum avanga vahvelna zawng zawng social media-a thehdarh a, midang hminga thehdarh ni si a ziaktu tur erawh amah hre chiangtute chuan an tinzawn theih sa hi a awm a, publicity hi duh mai ni lovin a atchilhin a atchilh huam huam a ni awm e. Tichuan, MLA lama din tum mi dang pakhat leh pawh khuallianahte a insawm tir a, a chang leh ṭhalai intihhlimna (sports, music etc) buatsaihin a sum a seng a, amah a intilar chho mek an la ti ta deuh deuh. TV enkawltute hnena “Programme min siamsak rawh u,” tite pawh an awm an ti.
Tunlaia nula hmelṭha pawh hi publicity atchilh tho an ni a, lar duh vangin an inphelh ruak titih hreh lova, thawmhnaw tawngchham tak tak inbelin thla an la a, an duh chu ‘publicity’ tho niin social media-a likers leh follower ngah chu an tum ber a ni, an tia lawm.
Publicity atchilh, mahni intihlar tumte hi chinchang hre lote chuan, “An va ropui ve... an va chhe lo ve,” etc an ti a nih pawhin, mi pangngai chin chuan an nuih a, a hre chiangtute phei chuan an hmusit lek lek an tia lawm.
- C Lalremruata