ASSEMBLY SESSION THLIRNA

Mizoram, tun hmaa Lushai Hills kan tih thin hi kum 1952 hma lam kha chuan dan mumala awp a ni ngai lo va. Ziak leh chhiar pawh thiam lo Mizo lalte’n an duh danin an awp a, lal ṭha deuh nei khua an vannei a, lal phûnglûng leh khawsa duhdah deuh khua an vanduai a ni mai. An rorel dana lungawi lo te pawh khan khawiah mah vuina leh dawvân kaina tur (court of appeal) an nei miah lo.

Kum 1890 chhova Sap hovin an rawn awp hnu pawh khan Mizote tan dan siam pawl an awm chuang lo va, Bawrhsap, Political officer emaw Superintendent an tih emaw te khan ṭha an tih danin an awp tawp mai a, rorel puitu Council emaw Adviser emaw an nei ngai lo. Excluded Area, Governorin Assam sawrkar kalkâna khing Bawrhsap hmanga a awp vang khi a ni ber ang - an duh dân dânin dân an siam a, sakawr chung chuang chung pawhin dân an siam mai thei ni-a sawi an ni.

Khâng lai hun khan Mizote khan rorelna leh inawpna government awmzia hi an la hre pha teuh lo va. Chuvangin, an tan chuan Mizo lal te leh Bawrhsap te kha an hmuh theih pathian an ni ringawt a ni. India indan dawn 1947 hma deuh erawh kha chuan politics lama harhna an chang ṭan a, political party te pawh an han din chho va. Mahse, a sehsâm chhung kha a rei viau mai a. District Advisory Council nena an inawih chhoh laih laih hnu chuan kum 1952 khan District Council neiin mipui aiawh te’n ro an rel ve ṭan ta chauh va. Chutiang chuan vawiin ni hi kan rawn thleng chho ve ta a ni. Keimahni thlan, kan aiawh te ngeiin State Legislature/ Assembly-ah kan tan ro an rel ve ta a, kan changkâng sawt hle mai, ti ila a dik thui hle awm e.

Mizoram State Assembly session rorel lai hi TV lamah ka lo thlir ve fo a, Budget Session phei hi chu bengvarthlak lehzualin ka hria. Tuna Assembly Session neih zawh tak pawh kha thlir a manhla hle a ni. House chhungah kan MLA leh Minister te’n House zahawmna an vawng ṭha a, incheina pawh an fimkhurin,

ṭawngkam mawi lo leh dêngkhâwng tak tak an hmang lo te hian Asembly Session thlir a tinuam hle mai. Thu inchuh leh aw ki han sân deuh chang te chu awm teh meuh mahse, House rorel su buai khawp engmah a awm lote kha a thawventhlâk khawp mai. Parliament Session-ah in-au buai leh phili-in ni 15 zet chu hei rorel thei lovin an awm a. State ṭhenkhatah lah an Assembly Session laia inhau mai duhtawk lova kut thawh hial, lehkha leh aurinna hiala invawm a, inhliam te an awm. Heng thilte ngaihtuah chuan Mizoram Assembly Session chu la thianghlim tak a ni.

Kan Minister te pawhin an hna chan­pual an hre thawkhat hle a, zawhna leh chhannaah pawh an che buai lo viau mai. Finance Ministerin fel taka Annual Financial Statement leh Budget Estimate a pharh hnu-ah Department changtu Minister te’n an sum hman tur theuh pass pui tura an rawn chhawp chhuak chho zel a. Minister te’n an Department an hre chiangin a ṭulah chuan an chhan thiam hle bawk. Pu R.Romawia phei kha chuan a department pathum, Art & Culture, Land Revenue and Settlement leh Higher Education te sum hman tur pass pui tura dil paha evangelist sermon ang maia inphamana a Department te hnathawh dan a han hlap chho kha chu ngaihnawm tak a ni. Hnialkalhtu Pawl sawi tur zawng zawng pawh a sawi khalh ta vek emaw tih tur hial a ni. (27.3.2018). Pu R.Romawia hi Shillong-a College kan kal lai aṭanga ka hriat tawh, Baptist Kohhrana kan Sunday School Superintendent ṭhin kha a ni a, thusawi a thiam viau pawh hi a awm e.

Minister dangte pawh tawnhriat nei vek tawh an ni bawk a, an chhuanawm viau zel mai. Tin, hnialkalhtu pawl Leader Pu Vanlalzawma resolution ruihhlo do chungchang pawh Ruling Party member lamte pawhin sawi leh sel awm hauh lova an pass pui thei mai te khan kan aiawha kan thlante hi mi puitling tak zawng an lo ni tih a tilang hle. (23.3.2018). Hetah hian House Leader CM pawh fak tur a ni ang. Zawhna leh chhanna hun leh demand sawiho laia rawn inrawlh dan tawk pawh a thiam hle.

House kaihruaitu Presiding Officer Pu Hiphei pawh, tawnhriat lo nei tam tawh a nihna a lang a, Session a kaihhruai dan a zahawmin a hun leh hmun a hre ṭhin hle. Heng zawng zawng ngaihtuah hian Mizoram Assembly House inkaihhruai dan leh member te khawsak dan hi hnam dang te tan pawh entawn tlak tak niin ka hria. Chutih lai erawh chuan heng hi han sawi belh ila.

Zawhna leh chhanna huna zawhna neituin a zawhna zawng zawng an rawn chhiar chhuak ṭhin kha hmun dangah an tih awm pawh ka hre lo. Chu mai bakah zawhna chhangtu Minister khan zawhna kha a han chhiar chhuak leh vek phawt a, chutah a chhang ta chauh ṭhin a, hun a duh reiin a buaithlak a ni lo maw ka ti. Hmun danga kan lo hriat ve tawhah chuan zawhna nei tu khan a zawhna number chauh sawiin, “Pu Speaker, Starred Question Number 72” a rawn ti mai a, (Zawhna kha a hma ni engemaw zatah Department lam khan an lo kawl tawh a, a chhanna pawh an lo buatsaih vek tawh si a.) Tichuan Minister-in zawhna chhiar chhuak tawh kher lovin A, B, C, etc dungzuiin a chhang zui mai ṭhin.

Zawhna chhanna copy kha a hmain member zawng zawng hnenah sem vek tura beisei a ni ṭhin. Zawh belhna (supplementary question) erawh chu hmun leh hmuna inzawh chawp a nih avangin chutianga kaihtawi chu a rem ve lo thung. A chang chuan member ṭhenkhat Pu K.Sangṭhuama leh Dr. Beichhua leh Pu John Siamkunga te khan an question number chauh an rawn sawi chang a awm a, hun an heh lo bik hle. Amaherawhchu, a hmaa member te hnena chhanna copy pek an nih loh chuan zawhna han chhiar chhuah kher kha a ṭul pawh a ni mai thei e. Rule of Procedure and Conduct of Business, for Mizoram Legislative Assembly-ah hian he thil hi chipchiar taka sawina a awm lem lo niin a lang.

Minister te Demand for Grants pharh laia eptu lam leh rorel member ten an han sawi zui ṭhin kha a ngaihnawm tlangpui hle a. Hei hi thlirtute nghahhlelh ber a ni a. Eptu lamin sawrkar hmaih ṭhelhte an han chuk fak fak te kha a bengvarthlak. Chutih lai erawh chuan ni 28th Session-a Pu Lalthanzara (Health, PWD, Information) leh Pu Ngunlianchunga (Vety &AH, Disaster Management, Printing & Stationary) te deptt pawisa mamawh pass tura pharh chhuah ni kha chu a danglam deuh viau mai.

Khatia Minister pahnihte’n an demand pass pui an dil hnu khan dan pangngai angin Speaker-in sawi zui duh tana hun a han hawn khan sawi tur an awm ta tlat lo mai a. A reh vung vung mai a, a khawharthlak hman hle. Speaker khan a turin a tur hlawm a ni ber. A tawpah ‘tlawmngaih chhuahin’ Pu Lalthanliana khan a rawn sawi ta hram a. Ani hnu-ah hian phur hmel lutuk lovin takin member dangin an rawn zui ve leh a, chawhnu dar li thleng chuan an sawi zui ta a. Mahse ni danga demand sawi kha a phak lovin a lang, a boruak a dul deuh ruih a ni. Tin, Session khar ni-a Speaker-in zawhna chhang thei lo department an awm thu a sawi kha chu a zia lo deuh a ni.

House chhung hi hmun zahawm leh a sakechek nazawng luhna chi pawh a ni lo va. Chuvangin a chhunga che tla ṭhin te pawhin an chetziaah an fimkhur em em a. Session lai phei chuan House hi a zahawm lehzual. Chutih lai chuan thu zangkhai lam te pawh rawlh zauh chang a awm thei a. Transport Department hnuaia bus 49 zet nei MST-in an sum hmuh chhuah a tlem viau chungchanga Minister Pu John Rotluanga’n zep hauh lova an hlawkpui lohzia a sawi te kha a hlimawm letling viau.

House of Commons-ah khuan Winston Churchill-a khan mi a tihlim thiam hle ṭhin nia sawi a ni. Vawi khat pawh MP pakhatin uar taka thu a sawi laiin Churchill-a chuan pawm lo ni awm fahran hian a lu a lo thing vei mût mût ṭhin a. Chu MP chuan a hmuhin a lawm vak lo va, “Kan member zahawm tak chuan ka thusawi awih lovin a lu a lo thing a ni maw? Keima ngaihdan chauh a nia ka sawi ni” a rawn ti a. Chutah Churchilla chuan diau lo deuh khan, “Kei pawh keima lu chauh a nia ka thin ni” a han ti leh kher a ni awm e.

- P.C.Lawmkunga