THE MIZORAM AGRICULTURAL LAND LEASING BILL 2021 KHA
Mizoram thingtlang khua, a bik takin National Highway kal tlangna khaw tam berah hi chuan ram chuangtlai a awm tawh meuh awm love. Khaw tam berah hi chuan an ram chhung kilkhawr lai tak tak pawh ‘chu mi kha mi ram a ni e’ an ti deuh vek tawh mai.
A khaw chhunga mi khawsa thei deuh leh rilru pamham leh inti fing deuhte phei chuan hmun 4/5- ah ram an nei. Tih rualin Aizawl lam mi khawsathei hote lahin khawtlang inleina aia sang deuhin an han lei a, hmun tin maiah a bikin NH kawng kam hmun ṭha lai tam zawkah ram an han nei fer fur bawk a. Khaw chhung mi a nachang hre lo deuh leh hamhai vak lo chu ram nei lovin an awm ta mai mai zawng a nih hi!
MNF sorkar hmasak khan ram siam fel an tum dawn ni khan sawi a awm a, thingtlang ram nei ve lote tan chuan a lawmawm hman viau a; mahse a thawmah ringawt a thamral leh ta mai a. Chutah Congress an han sorkar a, beisei a sang vak lo sa nen, thingtlang lonei mite hmakhua an ngaihtuah dan a chuti teh ual lo a, ram nei lote tan chuan han chhenfakawmna a awm vak lem ta lo a nih ber kha! Tichuan thingtlang ram nei ve lote tan chuan awm ngaihna hriat a har hle. Kan lo neih a bang thei bawk si lo. Lo tur ram ṭheh pawh a awm thei ta lo a, kan ṭhenawm, ram ngahte ram neih hawh turin kan dil kan dil ta mai zawng a nih hi! A luhai thlak duh ngei mai.
Heng ram neih hawh atana kan dil ṭhinte lah hian an ram neih hi Revenue pass fel fek fawka neih a awm der bawk si lo. Kan V/C kal tawhte hminga pass, a lem nge a tak tih pawh hriat theih fumfe mang loha siamte a ni nawk awm e. Thil mak tak mai pakhat chu heng an ramte hi leiman chawi a awm der bawk lo!
Chhiah chawi awm der si lovin, rampalaileng zau tak tak chu ‘ka ram’ an ti fer fur a, ram chuangtlai a awm der bawk si lo. Mirethei leh mi pamham lote chuan ram pawh nei lovin, sorkar department lamin zau hmalakna chi hrang hrang leh pangang khawi thlenga hmalakna an han neih nikhua pawhin ram nei ve lo, mirethei te te te chuan mi awmthei zawkte ram neih hawhin, chhungkaw 4/5 in mi pakhat ram an in neih sem a. Chungah chuan banhla, serthlum, lakhuih, atc. an ching ta ṭhin a. An ram neih sak, land lord hnenah kum tin a neih man pek a lo ngai bawk si nen, he ti reng reng chuan kan sorkar department zau hmalakna ṭhin hi hlawhtlin ngaihna chu a awm vak lo zawng a ni ber e.
Tunah hei kan Mizoram Legislative Assembly Session chuan, The Mizoram Agricultural Land Leasing Bill 2021 a pass ta rup a. Kan House leader sawi hmang ang kha a nih ngai chuan ram nei reng reng chuan chhiah an phu tawk an chawi vek tur a ni dawn ta a. A tehkhinnaah pawh Vaphai ram neite a han hmang hial a nih kha. Chuvangin, thingtlanga ram nei thliah thluahte pawh hian chhiah an chawi vek a ngai dawn tihna a ni dawn ta a ni.
Chhiah chawi thei lo chuan an ram sorkarah an pek mai a ngai dawn tihna a ni ta. Tin, an ram pawh teh fel vek a ni ang a, ‘he ti chin hi ṭin 3/4 hmun a ni’ tih mai mai kha a theih tawh loh ang. Tichuan ram nei ve lote pawhin ram kan neih phah ve ngeina tur ni dawnin a lang ta. Kan House Leader sawi ang ngei khan tih puitlin ni se, Pu Zodintluanga’n house a a sawi ang khan ‘bill pass a, dan a nih hnu pawha bawhzuina awm lo’ ang kha chuan kal ve lo hram se a duhawm hle mai.
He Bill pass tak hi kei ni, thingtlang, ram nei ve lote tan chuan kan zalenna tur, ram kan neih ve ngeina tur, kan zalenna dar ni ngeiin kan ngai tlat a ni. Chuvangin, a hlawhtlin nan sorkar hian hma la nghal vat se kan va ti em!
- Patrick Z, Chhingchhip