Kawngpui ṭha neih a hun e...

Aizawl khawpui traffic jam lohna khawpuia siam tura thu min tiamtu kan Chief Minister Pu Zoramthanga chuan tunah hian a thusawi hlen ngei tumin hma a la mek turah ngai ila.

Mahse tun din­hmunah chuan kan Aizawl khawpui hi lirthei kan in tlan chhawk a, Covid vanga kan in khuahkhirh viau chung pawh hian Bawngkawn leh Dawrpui phei te, Zodin sipai canteen kual velah te sawn traffic a la jam reng tho mai a, traffic jam awm lohna khawpui neih hi tuna kan dinhmun atang chuan, motor tlan a tlem viau chung pawh hian kan la hlat viau niin a lang.

Chief Minister chuan Mizorama kawngpui tlo loh chhan leh chhiat hma chhan zawhna a chhannaah ruah tui tam lutuk vang a nih thu te a sawi a. Lung chang ṭha tawk lo leh alkatra ṭha tawk lo hman vanga kan kawngpui te hi tlo lo a nih thu a sawi bawk a ni. Contractor te leh hna viltu engineer te thiam loh a nih bawk thu a sawi tel a, mahse hnathawk ṭha lotute a sawi duah chung hian hnathawh ṭhat loh vanga hrem a neih erawh kan hre lawi si lo! Hetiang a chauh nih chuan a hlawk thei ang berin kawng siamtu contractor te hian hna an thawk hlawm zel dawn tih a chiang viau a ni.

CM hian cement concrete-a kawngpui siam an uar chhoh mek thu a sawi bawk a, eng ang pawhin kan kawngpui hi siam se mi corrupt te kan hrem ngam si loh a, an corrupt thu kan sawi fo ringawt chuan corruption hlauhawm lohzia kan pholang lek fang chauh a ni dawn tihna a ni.

Chief Minister berin kan rama kawng­pui chhiat hma chhan a sawi hi ka hnial hauh lo a, mahse thil hrang hrang fuh tawk loh vanga Mizoram kawngpuite hi a tlo lo a nih ngat chuan thil dik lo awm hriat reng si hi siam ṭhat ngam tur a ni ang.

Thil dik lo awm reng kan hotupa berin a en liam mai zel a nih chuan engtikah mah kawngpui ṭha kan nei lo tawp ang. Inpuhna leh rinthu sawi mai mai hian kawngpui kan neih ṭhat phah dawn lo tih a chiang e.

- Vohbika pa