Rubber chingtute hriat atan
Zoram Rubber chingtute tana hlawkna tel a lo hun ve ṭan dawn ta. Rubber hi market nei ṭha, hralhna awm lo tih awm ve lo, a rah seng hun chhung pawh kum 40 zet a ni a, rubber chu a tam tih khawvelah hriat a la ni lova, Mizoram hi rubber hmunin khat vek mahsela a hralhna lamah chuan in huphurh tur a awm dawn lo.
Khawvel chu sawi loh, India mamawhna pawh hi kan phuhru zo dawn lo. Khawvel hian a hmanna tur an hriat belh deuh deuh a, khawvel mamawhna hi a sang tual tual a ni. Tunah chuan rubber ching kan ṭhahnem ve ta thawkhat hle a. Chhungkaw sang telin rubber huan kan nei ta a, rubber pawh kung nuai tel kan ramah a ding ve ta a, ṭhenkhat a ching hmasa zual chhungkaw za chuang zet chuan an hnai thei ve dawn ta.
Ṭhenkhat kum hnih khat la nghah ngai te an ni. Rubber hi kum 6 ah te kum 7 naah te a hnai ṭan theih a, mahse, hnai ṭan kumah a ram nghal mai lo a, hnai chhunzawm char charin a pung chho zel a, kum 7 na thlengin a hnai a pung chho zel a ni. Ṭhenkhatin kum 9, kum 10 ah hnai a tam tur emaw tiin an nghak ṭhin a. Kum 9/10 ah pawh hnai tan kumah a tam nghal chuang lo. Rubber hi hnai zela tam tual tual ang hi a ni a, a pung tual tual ṭhin.
‘Rubber chingtute hriat atan’ kan ti a, chin tumte tana hriat tur pawh han tarlang ila. Rubber hian hmun hniam lam a ngeih a, lei ṭha leh hnawngah a ṭha duh bik. A phun dan/kar hlat zawng chu a phei zawngin ft. 10 or 12 ni se, a chho/ chhuk zawng chu ft.15 ni se, tun hma chuan hei aia khat hian an phun ṭhin a, tunlai (new system) ah chuan ft. 10x15 hi a ṭha zawk. A chhan pakhat chu a kung a lo puitlinin a zar a invaw phak a, thlipui lakah a him bik a; a kung leh kung a in chhan him thei a ni. Tin, a ram zau lam inangah a kung a leng tam a, a hlawk zawk.
Ram hactare khatah kung 600 a leng a, kung 1 ah ni khat hnai 200ml (a tlem lama chhutin) hi kum 3/4 naah chuan a chhuak a. Thla 1 ah ni 15 hnai tur a ni a, ni 15 ah chuan 200x15 = 3000ml a ni. Rubber sheet hi a hnai 1/3 kg a chhuak a, tichuan 1000ml chu kg.1 tihna a ni. Kg.1 chu Rs. 150/- a chhutin kung khatin Rs. 150/- thla 1 ah a hring a, kung 600/ hactare 1 chu 600x150 = Rs. 90,000/- a ni. Hectare 1 kung 600 ah Rs. 90,000/- (singkua) a hmuh theih a, kum khatah thla 10 hnai tura chhut tur a ni. Tichuan, Rs. 90000x10 thlaah Rs. 9,00,000/- tihna a ni.
Ching duh leh hre chiang duh chuan in min rawn zawt zel dawn nia. A chi pawh a stamp emaw poly pot sa in emaw kan in nghaihtuah pui zel dawn nia. Zoram kut hnathawktute i ṭang fan fan ang u, kawl a eng ṭan ta.
- Vanlawma Chhangte contact : 9862378236