Tun lai kan sorkar hrawn hi

Tun lai kan sorkar hrawn chu a buaithlakin a hahthlak hle mai. Hripui len buaithlak lai tak leh khawsak harsat lai takin electric bill a sang vak mai a. An chhut dan an sawi leh a taka in mil thei der lo. Dawr leh sikul, electric hmang ngai loah pawh a sang vak a, thla thum chawh rual an tih pawhin a dik bawk si lo.

Power minister lah chuan thu pawmawm em em loh a sawi a sawi ve sek a. Tui bill pawh hripui len laiin an siam thei reng a, electric meter pawh pawnah dah vek ni si hi enga tinge an siam theih loh bik? Hri len mangang lai taka bill tihsan hi mipui inzah lohna chiangbal a ni.

CM lah hi a dai fuh thei lo. A lal tirh khan flyover a buai­pui a, Bawngkawn velah a phar kual nasa. Vaivakawnah te khan an pung khawm luih luih a, mah se an term chanve thleng hian ban pakhat pawh phun a la ni lo. Tunah Aizawl leiverh thu a rawn sawi leh, kan pu hian a sawi hi a duh tawk viau zel ang a, ti hlawhtling tlukah in ngaiin thil dang a sawi belh leh nge maw ni le tih theih a ni. Rua (mau) nise a puitling tawh pawh tlawn khat Rs 35 vela lei theih hi a chi Rs 85 velin an han lei riap a nia. Rs 85 vel a lei hi a puitlin hunah cheng eng zat takin hralh thei ang maw? Mau dang ai chuan a to viau chu a ngai ngei ang, a hmanna hre sa a tih tirh an ni ngei turah ngai ila. Mumang ram lam te pawh hi kan ang lek lek ṭhin.

Kan CM hrim hrim pawh hi ama pualin Chief Minister Office-ah staff tam tak, Addl CS hova an awm lai hian indaih tawk lo a ti nge Adviser pahnih (MoS rank) a neih bakah hian thiamna bik nei em em pawh ni lo (an ti) OSD to CM atan an ruat lehin, Secretary rank an pe pawp a. Kan CM hi constable aṭanga IGP kai theih dan sawitu kha a ni a, chu aia ropui zawk zan khat thilthu a sorkar hnathawk sang ber Secretary kai tir dan pawh a lo hre hle a nih hi. A term tawp hma hian thil mak leh dangdai tak eng thil nge lo thleng leh ang maw le?

Chhim lam unaute chuan sorkarah RT-PCR khawl an dil a, Sorkar lah chuan Municipal pek a tum emaw ni. Hripui kan dona kawnga thil pawimawh tak RT-PCR kan mamawh tiin court-ah an zualko a, court-in tih sak teh u a tiin sorkar a hriattir a. Mahse, Sorkar lam chuan pek loh dan ngawt a zawng emaw tih tur a ni bawk si.

Court zah loa puh hial an ni a, eng tak ang zel ang maw le? He khawl lian tham tak pawh ni lo vang hian sorkar chu a inti hmingchhe mek a, inthlan lehah chuan he khawl hmang hian an MLA hi an hralh mai ang tih pawh a hlauhawm ta hle mai. Mi in RT-PCR dil na na na a, an dil loh zawk Municipal pek luih ṭalh han tum emaw ni tih tur a ni.

Municipal hian an ni za hlawh (NREGS) a lak sak phei chuan eng hmasawnna tak tak thleng lo hian an tawrh phah zawk mai ang emaw ni? Khawpui hausakna in Lunglei a thleng ve mai awm bawk si lova, chhiah a pung ang a, mahse an dawn aiin an chan hi a tam zawk ang tih pawh a sawi theih loh e. Chhimlam hi engtin kal pui zel ang maw le?

Tun hnaiah Mizoram Pollution Control Board Chairman tur an ruat leh a hma lawka recruitment rules an siam en hian tute duhsak zawng dah luh tumna avanga dan hi siam rem a ang deuh roh. Air Act leh Water Act in a sawi ang lam aiin sorkar hian an mi dah turte remchanna milin dan an siam rem a, kum 10 judge tih vel an belh ta mai a nih hmel. Hetiang technical thil, mi bik dahna tur pawh an pawngsual duh chu a ni a, a mak ṭhin teh e. (Chutah a Minister berin recruitment siam hmain appoint angin a sawi leh a, dan siam hi July-ah chhuah a ni a, appointment hi August ah pek a ni bawk si).

Mizoramah hian duhsak leh hmelhriatte tana dan pawh sawih leh siamrem hi a mikhual lem lo. Service lai mek leh a thar lak kawngah pawh hian tute chhungte tan bika pawisawi leh siam rem hi a tam viau a ni awm e. Tum nei sa a, lak tur bik tin zawna interview koh te, tling tur leh duhsak tur bik neia exam buatsaih te pawh a tam viau ṭhin. Sorkar hi a fimkhur deuh deuh a ngaih hmel viau a ni.

Tuna kan sorkar hrawn mek hi han en hianin kan ram hi Kristian ram ni awm pawhin kan lang lo fo.

Hmanniah Aibawk Mini Sports Complex chung changah estimate 45% in hna 80-90% zawh tawh a nih thu an thehdarh a. A hnu lawkah thlalak te an han tarlang a. Mihring sam fai rual loh JCB laih tir ngai hiala hnim a lo ni leh si a. Engati nge a hnu lawka lai lan leh mai tur ni si hian dawt chiang lutuk te hi kan sawi fo mai le! Kan Minster te ah pawh a bang chuang lo, thudik tawk lo, belhchian a nuih ti za deuh deuh hi an sawi zing viau.

Kan ram kal dan hi a dik tawk lo, mi dang nen kan in tehkhin chuan ṭha kan ti viau a, midang ṭha lote avanga kan dinhmun hi ṭha chawp emaw sang ta mai a nih chuan a zia lo hle ang.

Tuna kan dinhmun en hian kan nih tur ang hi kan ni meuh em? Kan hmasawn tur ang hian hma kan sawm meuh em le? Kan sorkar hi a in enlet deuh a ngai a ni e.

- Lalramngaiha