Mizoram No. 1 nihna

Tunlai chu India ram pumah a ṭha lo zawng zela hriat kan hlawh chho hian ṭum danga ka awih ngai loh "Pathian hremna a ni ang," tihte hi a dik palh ang tih ka hläu ru ta rum rum mai.

Pathian hi chuan Thuthlung Hlui hun ni tawh lo Thuthlung Thar hunah hi chuan a hringa hranin mi a hrem tawh lovah ka ngai a, tuna kan rama hri pung pawh hi hremna ni lo turah ngai ila a hahdam phawt ang chu.

India ramah RTPCR kan nei tlem ber a, Population aṭanga chhutin hri kai tam ber kan ni. North East state zingah hri kai tam ber kan ni mêk a, North East zingah ni khata hri kai tam ber kan ni leh ta mêk bawk; pakhatna kan hauhna hi a mak em em lutuk a ni.

Hetihlai mêk hian kan hotute chuan phul lem an phah thar thu chhuang takin an sawi a, hei hi chhuan loh tur a nih loh laiin RTPCR laboratory pakhat chiah neiin District tina phul lem lo phah theih si hi a zahthlak zawk a ni.

Kan ram hian a uar loh tur zawk a uar a, kan ramah hian mamawh loh zawk kan buaipui a ni thei mai lo maw? tih hi zawhna pawimawh tak chu a ni.

India rama RTPCR nei tlem ber state kan nih laia kawngpui chhawng siam tum leh tuna lei verh tum sawi te pawh hi a inhmeh lo a tih theih. Development hi chu a kal reng tur a ni a, phul lem pawh phah zel tur niin kawng chhawng pawh a theih chuan siam tur. A theih phei chuan kawng pawh verh zel bawk se, mah se RTPCR Laboratory pawh neih belh ila a ṭha ang.

Task Force nen, an pawisa nen, an hun leh tha nen Covid-19 kan han do tak tak chu sorkar hnathawk leh hnathawk lo Covid-19 do tura an thawh chhuah dan kha sorkar hnathawk 1 zelah sorkar hnathawk lo 10 an ni phak hial dâwn a, khaw tina Task Force awm dan aṭangin a teh theih a ni.

Sorkar sum sen tur pawh Task Force leh mipui thawh khawm pawisa bakah sorkar infrastructure ni lovah Covid-19 positive enkawl niin mipuiin tam tak an in seng so a ni. He sorkar hian RTPCR Laboratory a din duh loh avanga hremna ni lo hram hram se, Thuthlung Thar era lamah hi chuan direct taka in hrem hi ka pawm duh loh thil a la ni zel.

Kan sawi kual duah hnua a khaikhawmna chu Covid-19 thila India rama kan no. 1 nihna hrang hrang - Lockdown rei no. 1, Sorkar hnathawk lo Covid Frontline Worker Volunteer inpe (Task Force) No. 1, RTPCR nei tlem no. 1 tihte hi lawmawm lo lam hlir a nih avangin hrem kan nih leh nih loh lam aiin in en fiah ve hrim hrim chu kan mamawh a ni.

- PC Lalramnghaka