Lunglei ṭhalai pawl chet dan kha...

Lunglei ṭhalai pawl tia invuahte tun hnaiah kawngpui siam mek an duh khawp loh vangin na deuh takin an che a, kha khan rah ṭha chhuah tal se a lawmawm ngawt ang. An chet dan kha mi tam tak chuan rawva ti an awm a, a ṭhen chuan a âwm ve rengah ngai an awm bawk.

Ni e, ṭhalai pawlte kha an chetdan a na deuh pawh a nih hmel. Officer senior (Superintending Engineer) hmai chhanah aurinna hmangin zahpah lem lo takin au­khum a ni a, chu an aukhum lai video chu thehdarh a ni leh a, a tuartu leh a chhungte tan chuan tawrh a har ve ngawtin ka ring.

Hman deuhah Lunglei khawpuiah bawk tharum thawhna a thleng a, Magistrate chenna in an suasam chiam tawh a, an chhungkua-in thlabar takin an awm tawh a nih kha. Tuna kawngpui ṭha duh vanga ṭhalai pawl an che pawh hi na ve tak a ni. Tharum thawhna leh kut inthlakna awm lo mah se chet dan mawi lo tak a thleng leh hi inenfiah nan hmang se a duhawm hle.

SE an aukhum dan lah kha a mimal em em mai leh nghal a, PWD engineer-te hmuhsitna a lian deuh chu a ni. Eng ang takin nge engineer-te khan an ngaih ka hre lo a, a pawl ang pawha dem tham tak chu a ni. Ṭawngkam mawi leh hawihhawm zawkin ṭha takin an sawi tum kha hrilh theih tho a ni a, rilru nuam zanin an awm zui bik kher lo mai thei a ni.

Ni e, Lunglei ṭhalai pawl kha dem viau mah ila an duh kha a hriat a, an duh ber kawngpui ṭha neih a ni miau a, ram leh hnam hmangaihna chu a ni tho tho. Khatiang khan che na deuh lo se chu Tlawng to Pukpui inkar kawng chhe lutuk siamṭhat hnathawh a chak lo ang a, an hna pawh a chhe viau thei.

Kan engineer-te pawh hi Lunglei ṭhalai pawlte tih anga hrawk deuh chu an ngai ve reng reng. Engineer hlawh zat kan hre vek a, engineer hausa tak an ni deuh vek mai leh rethei tak an vang viau mai hi an in enlet nan pawh a ṭul hle. An hlawh phu loa in leh lo etc. nei an ni nawk maite hi mipui hian kan thikna a rei tawh. Hnathawhnaah an hna a ṭhat aiin ‘engzat nge ka ei ve theih ang?’ ti ni awm tak an awm nual ang. Hei tak hi Lunglei ṭhalaite khan an hria a, an thinrim tawpkhawk ve-ah ka ngai. Khatiang khan che lo se sorkar pawhin beng a chhu ngawng ang a, ṭha tehchiam si loin kawng pawh an siam ngei a rinawm.

Lunglei mipui tan chauh he kawng hi siam a ni lo a, Mizoram mipui tan chauh pawh a ni lo, he kawng zawhtu zawng zawng tan a nih miau avangin hnathawktute pawh an in ben harh a ngai ta a ni e.

- Lalrammawia