Khehpuam tawlhtu nih an zak lo

Ka thu hriat hi a takin ka hmu ve ngei mai a, pseudoe­phedrine tawlhtute hian khehpuam tawlh­tu nih hi an lo zak der lo tih Whatsapp group pakhat titi aṭangin ka hre thei a, a mak ka tiin a thinurthlak ka ti a, Mizo mipui hi min va han ngeinep taik em! tih hi ka rilru lama a thawh dan chu a ni.

Whatsapp group pakhat ka tel ve lohnaah hian kheh­puam lama hming­chhe tawhte hi an awm a, chu group-ah chuan ka hmelhriat pakhat hi a awm ve a, chu ka ṭhianpa chuan an group titi a sawi chhawng a, Zoram ṭhatna duhtute niin an titi ṭhin a, mi challang tak takte an ni a, an zingah hian mi hausa tak tak, nihna sang tak tak, politician te leh mi hrang hrang an awm a, chutah chuan khehpuam tawlh ṭhinte hi an awm ve a nih chu.

Chu Whatsapp group titiah chuan khehpuam tawlh­tute demna lam leh fiamthua an chhaihna lam hawi a awm a, chutah chuan khehpuama inhnamhnawihte chuan a chhaihtute chu khehpuam an hriat chian loh thu te, ruihhlo tawlh an nih loh thu te, dan anga damdawi tawlh mai an nih thu te, a sawiseltute chu dan an hriat loh thu te group-ah mi zawng zawng hriatin an chhál lêt ngam sak a ni. Hei hi ka ṭhianpa hian min entir a, ka hmu ve ngei a, ka chhiar ve ngei a ni. Ruihhlo siamna hmanraw tawlhtute an zak miah lo tihna a nih chu! Thin hi a rim lo thei lo.

Kan hmuh ve phak lohah hian eiruk chingte hi an eiruk zat sawiin an titi ṭhin hi ka ring ta rum rum a, project pakhata an ‘hlep’ neih zatte hi engineer-te hian an sawiho hialin ka ring ta rum rum a ni. Thil mak deuh ka tih chu hmana eiru an hmuhsit em em kha, tunah an chawimawi duh ta tlat zelte hi a ni a, eiruk thubuai awrh tawhte zak lem lova mipui hmaa an intihlar ngamna state kan nih chuan eiruk te, khehpuamte leh thil dang hi kan haw tak tak lo em ni? tih zawhna inzawh a ngai ta a ni.

Khaw pakhatah chuan, “Saw mite saw khehpuam an tih hma chuan eng an ni lo, tun hnaiah an lian thut a,” tia kawh tur hi an ngam mai an ti a, khehpuam ti ṭhinte hi khawtlang leh kohhranah an inkiltawih chuang miah lo an ti. Eiruka bul ṭan, tun hnua inti lian ta em em ṭhinte pawh hi an zak lem lova, thil mak tak tak kan hmu zel dawn a nih a rinawm.

Nimahsela Bible hian thil ṭha lo titute hi ah thlukin an awm dawn a ti a, rin aiin a ât ṭan har chu a nih hi.

- James Ralte