SORKAR SUM HMANNA LEH COVID-19 TUARTUTE

Sorkar hian sum a hmanna zinga thla kipa a pek chhuah ngai chi, 'recurring expen­diture' hi a luan chak bik ém avangin hetianga hman tùr hi chu fimkhur taka ngaihtuah a ngai fo ṭhin. Tuna Minister 12 kan neihte puihna ni ngei tùra ngaih Board 14 pawh hi thla kipa sum sèn ngaihna chi a ni. Hei vang hian kum 2019 aṭang khan kum tin chéng nuai sawm tam a liam ta.

India Constitution-ah chuan...
Kum 2003 a India Consti­tution siamṭhatna Article 164 (1A) chuan kum tam tak MP leh MLA duh zat zat Minister nih tir ṭhin chu rawn khapin, State-a MLA awm zat aṭanga tehin, za zela 15 bak Minister dah a phal ta lo va. State leh UT tè deuhte erawh MLA nei tlem mah se, Minister 12 neih a phalsak thung a ni.

Mizoram hian za zela 15 chauh hi Minister nei dawn ta ila chuan, Minister 6 chauh nei tùr kan ni. Mahse, ram danin a phal angin Minister 12 kan la nei ta zel a ni. State lian leh mihring tam tak awmnaah za zela 15 Minister neia felfai taka a inenkawl theih lai a, keini za zela 30 zet nei chunga Minister-te pui tùra Board 14 lai kan han nei tlat mai hi chu sum harsa leh COVID-19 avanga sum hmanna tam tak, mipui puih ngai ngawih ngawih, an thih ruala an leibain a ùmzui karah hian thil tih chi a va ni lo tak èm!

Hripui leng avanga hna­thawh theih loh thu Health Minister, Dr. R. Lalthang­liana'n a sawi lai a, hnathawk thei chuang lo, 'sum thuni nu' Board 14 lai te'n hlawh an la ve char char hi chu thil mak tak a tling a ni.

Hei mai hi a ni lo
Mizoram Public Service Commission (MPSC), ṭhalai mi thiamte inel a, a thiam thiamte lákna (meritocracy) hmanraw pawimawh tak chu duh tawk lovin, Party mite duhsakna ni ngeia ngaih, Mizoram Subordinate Service Selection Board (MSSSB) a han din leh a, sum chu a ral chak e, ṭul lo taka khawhral atan chuan a uiawm zozai mang e.

"Hey, Tonight" tum ang a ni -
Hetianga hripui leng kara mipui mangang au awin, ram nu leh pa a auh laia phullem phah lam chanchin thar lo ri ve fo pawh hi tun dinhmunah sports a ṭha lo e, tihna ni lovin, mitthi lumen zana 'Hey, Tonight!' leh 'Happy Birthday' hla sak lo tum phét ang deuh chauh a ni. A inrem lo a, kan hun tawn nen a inhmeh lo hle bawk! Thihna tuartu leh dam lote vel ṭaptu mai a ni.

A hmáwr bàwkna
MNF MLA 26 zingah hian, Mizoram sum neih ang ang renchem taka COVID-19 dona atana hmang daihzài thiam leh ṭul loa pawisa luanralna ti tawp ngam, kan Chief Minister êm aia zia deuh hi chu an awm hlauh lo maw?

- David Zochhuanmawia (Vida Hrahsel Saza)