THU DIK HRIAT KA VA DUH EM!
Kan hri leng Coronavirus chuan khawvel min va chawk buai hneh teh reng em aw! Mi chi tin, mi lian leh mi tê, mi hausa leh mi rethei, mi ropui leh mi tlawm, ram changkang leh changkang lo, rawngbawltu leh rawngbawltu lo pawh, buai lo leh tuar lo reng kan awm lo. Engti kawng emaw tal chuan min nghawng vek a. A chung chang hi engti kawng emaw tala sawi kan tum vek bawk a. A damdawi hria a pui kan tam a, a enkawl dan hria pawh kan tam.
A damdawi ṭha bera an ngaih leh sawi vaccine lahin sawichhetu a ngah em em a, kan thih phah puk puk dawn nia sawi te pawh a awm. Hemi phenah hian khawvel mi thiam leh ram hruaituten plan ruk, mihringte tih thih zawih zawihna tur an nei ni hiala sawitu te pawh an awm. Kan thih puk puk chu an tan a pawimawh riauna awm ni tak ang maw!
Sawi nep tum pawl lah bang lo. 'Kan ngai urhsun lutuk a ni, tlang hrileng ang leka ngaih tur a ni e,' ti pawlte pawh an awm. Chutih laiin, kan mi ṭha pui pui leh uiawm tak takin an thih phah mek bawk si a. Chung thihphah mek leh an dam chhuah hram theihna tura tuar fân fântute tan chuan sawi nep tumtute hi an ngeiawm duh viau mai awm mang nge, ka ti deuh ṭhin. 'An tuar ve loh vang a nih hi' te pawh an ti duh hialin ka ring e.
Lehlamah kan sawrkar hian an ti ṭha duh lo nia ngaih theih lek lek te pawhin a awm. A hria intiten an sawi danin central sawrkar lam chuan a hrik enna khawl ṭha ber leh rintlak ber, RT-PCR chu District tinah pakhat tal nei tura ngenna an siam niawm takin ka lo hria a. District tina neih chu sawi loh, state pumin pakhat kan inṭawm a. A dang neih belh tumna thawm lah awm der bawk si lo. 'Zirtirtu kan boral hi pawi i ti lo vem ni?' tih mai a awl e.
Hetiang hi a nih laiin a dam lote report lah chu kan pe uar thei em em a. Mipui hriata ṭangkaina awm reng reng lo, sawrkar record atana ṭha tawk chauh thlengin kan puang a. A kai thar zat, a dam zat, te hi puang se mipui hriat atan chuan ṭha tawk lek a nih tehlul nen. Khua leh veng hrang hranga kai zat; District tina kai zat, khawl hrang hranga ena hmuh zat, a percentage zawng zawng nen, thi zat leh dam lo awm tawh aṭanga a percentage nen lam. Oxygen hip mek, dam chhuah tuma ṭang fat fat zah te nen lama sawi chang te pawh a awm.
Chutih laiin tlang hri leng ang lek a, lo sawi te nen. Aw! Min va han tibuai chi kim lailêng tak em!
Sawrkara thawk sa doctor leh nurse te bakah, volunteer ho te nen. Volunteer kan tihte lah chu, sawrkarin hna an la dawna, chuta lak nih beisei vanga lo involunteer te nia sawina te a awm leh zel bawk. Veng tinah LLTF ni tina hna ṭhulha thawk, tirhchhiah leh hau bur, ṭhenkhatah intilala lo ngaih nih an hlawh. Min la tibuai dawn chauh niin a lang.
North East-a pun tam berna, Indiaa pathumna, tih te kan ni zak zak chungin sawrkar-in state dangte entawn leh a tiṭha ber zinga mi nia insawi reng bawk si. Kan MKHC te pawh hi hetiang hunah hian in ngawi mai mai dawn em ni? in mite kan buai a nih hi, nawr ngai nawr ula, zilh ngai an awm a nih chuan zilh ula. Pulpit tlanga in thu sawite awih chana kan chang ang bawkin, tun ang mangan hunah hian in kaih hruaina leh hna thawh kan ngaichang tih hi in hriat ṭha ka va ti em aw! Keini ang rual chu kan buai ta a nih hi.
Kan state-in hripui kan hma chhawn danah hian eng hi nge thu dik ni ta ber, hriat ka va duh em!
- Commissioner Lalkiamlova