TI ZAWNG HIAN HRI DO VE TAWH ILA...
Mi tin, a tê ber aṭanga
a ropui ber thlengin
Awh hmang an ni a.
Zâwlnei aṭanga
Puithiam thleng pawhin,
Mitinin bum an hmang si.
Ka fanu, ka mite hliam chu
ngaihsam takin,
'A ṭha alâwm, a ṭha alâwm!'
tiin an thawi a
A ṭha hauh si lova.
Hri do kawnga kan ram hruaitute mangang leh beidawng au thawm a lo chhuak ta. Lo thleng tûr rêng a ni. Ram hruaitu leh sakhaw puithiam, rawngbawltuten kan ti dik lova. Hripui laka him nan thildang kan hmachhuan a, ringtute ralthuam leh thiltihtheihna hmanraw ṭha ber Pathian biak kan hlamchhiah tial tial a.
Hri kai thar kan pung hret hret a, ṭanpuina lût a tam tehlul nen, mi ṭhahnemngaiten Central lam duh dana RT PCR khawl hmang tura ṭan lak an rawtnain awmzia a awm thei lova. Vawiin thlengin zeldin thu mai mai buaipuiin kan la buai a, kan ram roreltu lû ber berten Hripui hi an vei lo.
Kohhran hruaitute pawhin kan vei tak tak lo, CM Relief Fund-ah rorêltuten sum lût tam se an duh, sakhaw puithiamten thawhlawm lût tam se an duh. Heti ringawta kan kal chuan tho chhuak leh lawk lawk thei lovin hripui hmang hian van Pathianin min sawp lovang tih sawi har tak a ni.
Chuvângin, kan ram a dam theih nan Sawrkarin ti lo mah se, Lalpa rinchhanin Kohhranho hian kan Biak In i hawng ang u. Kan hman ṭhin rimawite hmangin zai leh lamin Lalpa fakin a hmaah i ṭhingṭhi tawh zawk teh ang u. Sawrkar thu nghaka Biak In kan hawng lo chung pawhin hri vei/ kai kan pung zel tho a, kan ram hruaitute an mangang tawh a nih hi.
Engkim chunga thuneitu Lalpa Biak nana a pûk a bâa kan sak Biak In-ah Lapa kan biak avangin tun aia nasaa hri kan inkaidarh hi a rinawm love. Lalpa ringin Biak In i hawng ang u.
Hel rilru pu chunga ziak ka ni lova, min tidamtu leh siamtu duh dan a nih ka rin vâng zawk a ni e. Daniela ṭhianten 'min chhan chhuak dawn lo mahse' an ti ngam nun te, Estherin Lalnu nihna a chan a chipuite chhanchhuah nan a hmang ngam ang khan tun hi ringtu kan nihna hman hun a ni tawh lawm ni?
- Dr R Lalzauva, Dawrpui