Thlalak sawngbawlna leh pianhmang hmuh dan (Photo Filter and Body Image)

Covid-19 avangin hun eng emaw chen chu kohhran inkhawm leh zirna in hrang hrang te zoom kaltlangin mahni In lamah kan kal ta vek a. Zoom te, Google meet te kan hmang uar ta hle, la hmelhriat miah lo chu kan tam vakin a rinawm loh. Zoom ah chuan thlalak sawngbawlna (photo fi lter) a awm lo va, duhtawka inchei pawhin lan ṭhat a har hle. Khawthlang lamah chuan mahni inhmuhhniamna (low self-esteem) nei an tam phah niin an sawi a, chuvang chuan ‘Zoom Dysmorphia’ tih ṭawngkam pawh a lo chhuah phah hial a ni. Chutihrual chuan nunphung pangngaiin kan nung thuai turah beisei ila, zoom hman a ngaih loh hunte a awm leh ngei ang. Chumi hunah chuan a reh mai turah a ngaih theih awm e.

Thlalak sawngbawlna (Photo Filter)
Mi tin kuta social media a lo thlen hnuah thil ṭangkai tak, kan landan aia ṭha deuh zawka min phó chhuak thei thlalak sawngbawlna (photo fi lter) a lo chhuak a. Hei erawh hi chuan zoom te angin min kiamsan maiin a rinawm loh thung. Heng thlalak sawngbawlna (photo fi lter) te hian hmêl duhawm zawk, îtawm leh pian nalh zawkah min a pho chhuak thei a, thil pawi tak thlen thei awmin a lang lem lo.

Heng thlalak sawngbawlna (photo filter) hmangte hian kan taksa kan siam danglam hlawk thei tawh a ni. Mit zim deuh tan mit zau leh lian deuh a siam theih a, hnar bawng deuhte pawhin an tizum deuh thei tawh a, mawng tê deuh te pawhin an duhtâwkin an siam lian thei a, tlema hang lamte pawhin an duhtâwk chiahin an vun rawng an siam ngo thei a, kan duhdan takin kan insiam danglam thei tawh a ni.

Pianhmang hmuh dan (Body Image)
Body Image hi self-image an ti bawk a, kan taksa pianhmang kan inhmuh dan tihna a ni a. Body Image leh Self Esteem hi a inzawm tlat a. Self Esteem chu keimahni kan inngaihdan/inhmuh dan (overall opinion of ourselves), kan hlutna leh zahawmna kan intehna a ni a. Self-esteem chuan kan taksa, rilru, leh thlarau thlenga kan enkawl dan a hril thei a ni. Taksa nalh tak kan neih chuan kan taksa chu kan chhuangin nuam kan ti thîn. Mi tu emawin a taksa a duh khawp loh chuan, mahni inhmuh hniamna an nei lian êm êm ṭhîn.

Healthy self-image a awm a, kan ṭhatna, theihna leh chakna lai kan inhlut thiamna hi a ni a. Kan inhmuh dan, kan hlutna teh dan hi darthlalang hmaah ni lovin kan rilru/ngaihtuahnaah a inṭan tih hriat a pawimawh hle. Chu chuan kan hlutna te, kan theihnate thlenga kan hmuh/ thlir dan a siam danglam thei bawk.

Photo filter in Body Image a nghawng dan
Journal of the American Medical Association-in a zirchiannaah chuan thlalak sawngbawlna (photo filter) avang hian kan hlutna (self-esteem),pianhmang hmun dan (body image) a thlak thei a, body dysmorphic disorder thlengin a thlen thei niin an sawi. Mahni landan aia mawi zawka insiam danglamna hian a ṭha lam aiin a ṭha lo lamah nghawng a nei lian zawk niin a lang.

Zirchianna pakhat chuan tleirawl 32% te chu an taksa chunga an lungawi loh piah lamah, Instagram in a belhchhah hle a ni an ti a. Instagram chu tleirawl zinga anxiety leh depression vei tamna chhan a ni tiin an sawi. The Wall Street Journal’s Jeff Horwitz chuan America a tleirawl mahni inthat (suicide) zinga 6% te chu Instagram leh a kaihhnawih thil vang niin a sawi bawk.

Thlalak sawngbawlna (photo filter) hian mihring pianpui taksa mawina piahlam a lantîr ṭhin a. Chu chuan mihring nihna leh kan landan tak duh khawp lohna a hring a, kan hriat loh karah pianpui taksa kan sitin kan iai phah tial tial thei. Miin thlalak an sawngbawl hrep hnu mawi tak an post te chuan mihring nihna piahlam landan (unrealistic expectations) a lan ve duhna min neihtîr ṭhin a. Thlalaka miin lan duh dan a rilruin a neih tawh chuan, a nihna tak taka a thlalak chu a lungawipui zo tawh ṭhîn lo a ni. Psychologist te chuan heng photo fi lters te hi a bikin tleirawl, rawlthar leh ṭhalaiho, an nihna tak tak la pha chiah si lo, puitlinna lam zawh mek teah hian a hnathawh a pawi thui zual bik niin an sawi.

Mizo ṭhalaite (photo filter leh body-image)
Mizo ṭhalai zingah zirchianna neih a ni a (Care and Counselling Instagram page Survey, total participants–4415), 69% te chuan social media-a an landan leh mi dang landan an inteh (compare) fo thu an sawi a. 42% te chuan photo fi lter tel lo chuan an lan nalh tawk loh thu an sawi bawk. 49% chuan midang thlalak nalh tak tak an hmuh ṭhin avangin anmahni pian leh taksa inhmuh hniam phahnan an hman phah hial a ni tih an sawi a. 47% lai chuan an pian leh taksaah an lungawi loh phah thu an sawi bawk. Chu mai a ni lo va, 25% te chuan an pian sitna avangin an chaw ei dan/zat thlengin a nghawng niin an sawi bawk.

Social media-a pian nalh leh hmelṭha tak tak an hmuh tam avangin an lan danah an lungawi lo va, chumi laka chhanchhuaktu chu photo filter hi a ni. A ṭhatna chu sawi tur a awm ve teh meuh mai, eng emaw chenah hlimna te, lawmna te a pe thei a. Mahse mihring nihphung/lan dan baka lan duhna (unrealistic expectations) anmahniah a tuh nasa em em a. Thil pawi em em chu social media-a an lan anga a taka lan an châkna thinlung kha a ni a, chu aia pawi lehzual zawk chu an nih chak
êm êm, a taka thlentîr an tumna hi a ni. Mizo ṭhalaite zingah chuan surgery em tih phah chu an awm a nih pawhin an tam a rinawm loh.

Surgery leh Non-Surgical Nose Job
Kum 2017 khan USA ah chuan tleirawl nuai 23 vel zet chuan social media-a thlalak sawngbawlna (photo filter) nena an lan ang tluka lan an duh avangin surgery an ti a. 62% plastic surgeon te chuan social media-a an lan dan an duh khawp loh avanga surgery tihsak an nih thu an sawi a. 57% te chuan selfie-a lan ṭhat an duh vang a ni an ti bawk. Hmel siam danglamna (cosmetic procedures) hi tleirawl, a bikin hmeichhiateah an intihhmuh tawh em em a. Plastic Surgeon te chuan Snapchat dysmorphia tih te pawh an phuah hial a ni. “Tleirawlte chuan thlalak sawngbawl sa nena rawn kalin doctor te hnenah thlalaka an lan dan nena inmil surgery tihsak turin min duh ṭhin,” tiin plastic surgeon pakhat chuan a sawi.

Mizo ṭhalaite zingah pawh nosesurgical nose job te pawh kan intihhmuh chho ṭan niin a lang a. Kan hnar bawng deuhte pawh kan siam zum deuh thei tawh a, kan hmuite pawh kan duhdan takin kan siam nalh (lipfiller) thei tawh a, mithmul pawh chhoh (browlifting) te thlengin. Social media nena a inzawmna sawi tur erawh zirchianna a la awm loh avangin kan sawi chiang ngam lo thung a. Amaherawhchu, khawthlang lam ṭhalaite intihhmuh mek hi kan hmabak a ni ve mai ang em tih hi
zawhna lian tak a ni.

Tlangkawmna
Mihring te hi Pathianin A anpuia a siam (image of God) kan ni a (Genesis 1:27). Pathian mithmuhah hian kan mawi êm êm tih kan hriat thar a pawimawh hle. Mi dang an loh hlauhna avanga mahni taksa hmuhhniamna kan nei a, kan taksa hial kan sit chuan A siamtu zah lohna a nih loh vek chuan kan hlat hle tihna a ni thei ang. Kan hlutna te, kan hlimnate hi kan chhehvel thil thlengah nghat lo vin, special taka min duangtu Pathianah zawk hian kan nghat tur a ni ang. Kan zahawmna pawh kan lan danah ni lo vin, min siamtu min siam chhan anga nun kan hman danah zawk a innghat a. Kan mawina chu kan landan (physical appearance) ah ni lo vin, Pathian avanga rinawm leh dik taka kan nun kan vawn thianghlim tlatna hi a ni zawk.

Kan mawi tur a ni, theihtawpin mite mithmuha lan mawi tumin kan inchei ang; mahse, dah pawimawh tur zawk dah pawimawh hmasa chung zelin ni se. Mawi loh kan hlau va, mite mithmuhah lansarh lohte kan hlau va, mi zinga tlaktlum loh kan hlauh lai hian kan Pathian mithmuhah hian engti ang chiahin kan lan tih hi kan
inzawh fo a pawimawh hle.

- Joel Zoramthansanga, Asst. Professor, Calvin Institute of Theology, Hyderabad