HRINGNUN HI - 5

Sorkar hna ka thawh ve tawhna pakhata kan Head of Department ṭawngkam hriatreng ka la nei a, chu chu ‘mi tu pawh nen hian inkawm ila, minutes 20 ah chuan kan duh zawng chu kan sawi vek hman’ tih a ni.

Officer a ni a, amah rawn kawmtu nitinin an awm a, a ni lah chu ṭhu reng peih chi a lo ni lem lo bawk a, a sawi tur tak pawh sawia hriatna ka nei. Mi office-ah kan leng a, kan lenna te hun neih dan hre hauh lo maia rei iak ṭhut chilh kan tum tlat ṭhin hi a dik lo.

Tlem lai khan kohhran lama kan rawngbawltu fel deuh mai hi ka inah a rawn leng a, ka lawm hle mai. Nimahsela, thingpui ka lum a, kan titi fe hnuah pawh chuan sawi tur vak hre chuang si lo hian a la ṭhu reng mai a, haw sela ka ti pawh a ni chuang lo a, kei lahin thil tih laklawh lai ka nei bawk nen chuan ka thiltih lai ṭhulh meuha kawm reng turin minute tam fe kan titi tawh a, lehkhabu chhiar tur ka pe a, ka thiltih lai chu ka tih san a, zahawm ka ti ang reng viau mai.

Hetiang ang hian kei ngei pawh midang inah ka leng fo a, ngam tlak tak tak inah lengin chaw ei nghal chang te pawh ka nei ṭhin. Nimahsela, an thiltih lai ṭhulh tir reng erawh ṭha ka ti ngai lo. Inlengte chu ngaihsak tur an ni a, thil dang tih laklawh lai kan neih pawhin chawlh rih hial pawh a ṭha.

Mifing zawkte’n ‘Time is Money’ an tih hi a dik a, hun hi a hmang thiamtu tan chuan hlawk takin an lo hmang

ṭhin a ni. Fritz Kreisler chuan mipui hmaah rimawi chi hrang hrang a tum ṭhin a, mipui tamna hmunah tumin sum tam tak lak luh nan a hmang ṭhin a, nu pakhat hian ‘I tum anga mawia tum thei tur kha chuan ka damchhunga beih pawh ka hnial lo’ a ti a, chu Violin tum thiam hmingthang chuan eng danga chhang lo chuan ‘Ka bei asin’ tih ringawtin a lo chhang a. Rah chhuah tur kan nih chuan chutiang chu kan ni tur a ni.

Mihringah hian rah duh­awm chhuah thei tur khawp thiltihtheihna tur chu a awm sa reng a, mahse chumi hman ṭangkai theihna chu thawhrimnaah a innghat. Tui zawng zir thiam leh phi chung lam hi a ni lo, rah chhuah tura awmze neia thawhrim a ni mai. Chumi daltu apiang chu paih tur. Mifing apiang te hian hun hlutzia an hria.

Mi hlawhtling te chanchin sawi tur tam tak kan hria ang, Thomas Alva Edison ngei pawh khan chanchin ngaihnawm tak tak a nei a, a thawhpui nu Mary nena an inneih tur hun pawh a lo hai pek a, Laboratory room

aṭangin a nih kha Biak In lam a pan. Khatiang khawp khan a thiltih laiah inpumpek lo sela chuan Edison hi kan hre hauh lo ang.

Hun hi a hlu a, a man a sang a, nimahsela mi ṭhen­khatte hun hman danah erawh chuan hun hian man a nei lo mai pawh ni loin an hun hman ṭhat loh avangin a hnu rei tak thlengin a la nghawng zel a, khaw eng hmu ngam lo khawpa awmin, inchhirna khurah an tla lut zawk ṭhin a ni. I hun i hmang ṭha em le?

- Mahmuaka Chhakchhuak